मुख्यमंत्री धामीन ‘मुख्यमंत्री प्रोत्साहन योजना’ कायी सुरु, खिल्वारु (खिलाड़ी) तैं हर मैना मिलला द्वी-द्वी हजार रुप्या

देरादूण। मुख्यमंत्री धामीन आज राष्ट्रीय खेल दिवस क् मौका फर ‘मुख्यमंत्री प्रोत्साहन योजना’ सुरु कायी। यीं योजना मा 14 से 23 बरसु क 2600 खिल्वारू (खिलाड़ी) तैं फैदा होलु। योजना मा हरेक खिल्वार तैं हर मैना द्वी-द्वी हजार रुप्यौं क छात्रवृत्ति अर खेळु क समान खूंणि हरेक साल 10 हजार रुप्या दिये जाला।

देरादूण मा उर्यूं कार्यक्रम मा मुख्यमंत्री न कुछ खिल्वारू तैं द्वी-द्वी हजार रुप्यौं क चेक देकैकि योजनौं क सुर्वात कायी।

कार्यक्रम मा पैरालंपिक खिल्वार अर नेशनल पॉवर लिफ्टिंग मा गोल्ड मेडल ल्याण वला अपर पुलिस महानिदेशक अमित सिन्हा तैं बि सम्मानित कर्यें ग्यें।

ऐ मौका फर मुख्यमंत्री न घोषणा कायी महाराणा प्रताप स्पोर्ट्स कॉलेज देरादूण मा खिल्वारू खूंणि 200 डसाण (बिस्तर) कु छात्रावास बण्यें जालु। हरि सिंह थापा स्पोर्ट्स कॉलेज लेलू, पिथौरागढ़ मा खिल्वारु खूंणि 50 डसाण कु छात्रावास बण्यें जालु। मुख्यमंत्री खिल्वारू तैं रोज मिलण वलु खाणु क भत्ता 250 रुप्यौं तैं बढ़ेकि 480 रुप्या करणा क घोषणा कायी। उन्न बोलि बल राष्ट्रीय प्रतियोगिता मा भाग लिंण वला उत्तराखण्डा खिल्वारू तैं एसी बस अर थ्री टीयर एसी रेलगाड़ी क सुविधा दिये जाली।

मुख्यमंत्री न हॉकी का जादूगर मेजर ध्यानचंद क फोटो मा फुळ चढ़ै की ऊंतैं श्रद्धाजलि द्यायी।

ऐ मौका फर विधायक खजान दास, मेयर सुनील उनियाल गामा, विशेष प्रमुख सचिव खेल अभिनव कुमार, खेल निदेशक जितेन्द्र कुमार सोनकर छायीं।