मुख्यमंत्री धामीन कायी “ज्योति छात्रवृत्ति” अर “विजय छात्रवृत्ति” क सुरूवात, अब गरीब नौन्याळु थैं मिललि मदत

देरादूण। मुख्यमंत्री पुष्कर सिंह धामीन आज देरादूण मा बिधौळी मा यूनिवर्सिटी ऑफ पेट्रोलियम एंड एनर्जी स्टडीज मा पैसौं क तंगि मा रैंण वलि कुटम्दरि (आर्थिक रूप से कमजोर) क बच्चों खूंणि ‘ज्योति छात्रवृत्ति’ अर खय्लण वलों बच्चों खूंणि ‘विजय छात्रवृत्ति’ सुरू कायी।

ऐ मौका फर मुख्यमंत्री धामीन बोलि बल कै भि बड़ा संस्थान अर विश्वविद्यालय मा आणा अर वख पढ़ण से केवल वु बच्चों क हि जिन्दगि नि बणदि बल्कि वैक इन्नै-फन्नै रैंण वला मनखियों के जिन्दगि मा बौत बडु बदळौं आंद। इन्न मा मनखियों क रैंणा कु सगोर क दगड़ा मा कमै भि बढ़ि जांदा। उन्न बोलि कि उत्तराखण्ड क दूर गौ मा भि यूपीईएस कन कै कि अपडु सहयोग दे सकदु ईं बात फर विश्वविद्यालय थैं टक (ध्यान) लगाण प्वाड़लि। उन्न बोलि कि यूपीईएस न पढ़णन वला गरीब बच्चों अर खय्लण बल बच्चों खूंणि छात्रवृत्ति क सुरूआत कैकि बौत अच्छु काम कायी।

मुख्यमंत्रीन बोलि कि प्रधानमंत्री मोदी क काबिलियत से देस सबि तोक मा तड़तुडा़े (तेजी) ह्वैकि अगनै बणणु च। प्रधानमंत्री क सुपिन थैं पूरू करणा खूंणि हम सब थैं कर्मयोगी बढ़िक काम करण प्वाड़ळु। आज सर्या देस मा भारता कु मान, सम्मान अर स्वाभिमान बढ़णु च।
धामीन बोलि बल प्रधानमंत्री क नेतृत्व मा भारत मा कोविड कु टीका कु महा अभियान चल्यें ग्यें। देस मा कोविड क टीका 192 करोड़ से जादा मनखियों थैं लग्यें। अर हमन सर्या दुन्या थैं 20 करोड़ से जादा कोविड दवै द्यायी। उन्न बोलि बल शिक्षा क तोक मा बदलौं ल्याणा खूंणि हमन नै शिक्षा नीति 2020 थैं सुरू कैरि याली। उत्तराखण्ड राज्य मा यांकी सुरूवात हमन बाल वाटिका बटि करैं याली।

ऐ मौका फर मुख्यमंत्री न सब्यां प्रदेस क रैवासयिों थैं गुरू पूर्णिमा क बधै दे।