चारधाम जातरा: दर्शन खूंणि ह्वालु टोकन कु बन्दबस्त, नी लगण प्वाड़णु लम्बी-लम्बी लैन मा

देरादूण। चारधाम जातरा मा दर्शन करणा खूंणि अब लम्बी लैन मा नी लगण प्वाड़ळु । दर्शन करणा खूंणि अब स्लॉट/ टोकन कु बन्दबस्त सरकारन कै याली। अब बारी आण क बाद जादा से जादा एक घण्टा मा दर्शन ह्वै जाला। या जाणकारि प्रदेसा प्रर्यटन धर्मस्व, संस्कृति, लोक निर्माण, सिंचाई, पंचायतीराज, ग्रामीण निर्माण एवं जलागम मंत्री सतपाल जी महाराज दे।

महाराजन बोलि कि चार धाम श्री बदरीधाम, श्री केदारनाथ, श्री गंगोत्री धाम, अर यमुनोत्री धाम मा दर्शन करणा खूंणि घण्टों लगि जान्द छायी, उन्न बोलि कि अब हमन दर्शना करणा खूंणि टोकन कु बन्दबस्त कै याली या से भक्तु थैं घण्टों लैन मा लगिकि दर्शन करणा कु इंतजार नी करण प्वाड़ळु। उन्न बतै जिलाधिकारी क मंजूरी आधार पर धामु मा रोजना दर्शन करणा क संख्या तय कै याली।

पर्यटन मंत्री न बोलि कि ऐ बन्दबस्त मा मन्दिर ख्वलण क बगत (घण्टा) से रोज दर्शन करण वळों क तय संख्या तैं भाग कैकि एक एक घण्टा मा दर्शनकरण वलों क संख्या थैं तय कर्यें जालु। उन्न बोलि यु बन्दबस्त हूंण से जातरियों थैं एक घण्टा हि लैन मा लगण प्वाड़ळु। उन्न बोलि सबि धामु मा टोकन कु बन्दबस्त खूंणि काउन्टर लग्ये जाला।

महाराजन चारधाम जातरा मा बढ़दा जाणि जातरी संख्या पर खुशी जतै अर बोलि कि जन जातरी अपडु पंजीकरण करवाणा छन अर गढ़वाल मण्डल विकास निगम क गेस्ट हाउसु थैं बुक करणा छन वु प्रदेसा खूंणि बौत शुभ च।

पर्यटन मंत्री बोलि कि चारधाम यात्रा खूंणि ऑनलाइन पर्यटन विभाग क वेबसाइट
registrationandtouristcare-uk-gov-in, व्हाट्सएप नंबर 8394833833 अर टोल फ्री नंबर 1364 फर अपडु रजिस्ट्रेशन कर्वै सकदन।