अब चारधाम नौं पर समिति अर ट्रस्ट नी बणै जै सकली
देरादूण। उत्तराखण्डा सरकारन कैबिनेट म प्रदेसा चार धाम अर हौरि मंदिरु क नौं से ट्रस्ट अर समिति बणौंणा क खिलाप विधिक प्राविधान करणा कु फैसला ल्यायी।
मुख्यमंत्री धामी क अध्यक्षता म आज उर्यीं कैबिनेट बैठक म प्रदेसा धाम अर हौरि मंदिरु से मिलण वला नौं पर समिति अर ट्रस्ट बणौंणा खिलाप विधिक प्राविधान करै जाणा कु फैसला ल्यायी।
कैबिनेट म यु विषय छुंयीं (चर्चा) खुणि धरै ग्यायी की प्रदेसम कुछ लोग अर संस्था उत्तराखण्ड प्रदेसा चारधाम श्री बदरीनाथ धाम, केदारनाथ, गंगोत्री धमा, श्री यमुनोत्री धाम अर हौरि मन्दिरु क नौं पर ट्रस्ट अर समिति बणै चलौंणा छन।
यां से प्रदेसम अकबक स्थिति हूंयीं च अर लोगुकि परम्पर अर भावना तैं ठीस लगणि च, प्रदेसा लोग नराज छन। यांका वास्ता प्रदेस सरकारन विधिक प्राविधान लागू करणा कु फैसला कैबिनेट म प्रदेसा भलै खुणि कायी।
अब प्रदेसा भैर अर भितर क्वीं बि मनखि अर संस्था क्वीं बि समिति अर ट्रस्ट बणै की प्रदेसा चर्या धाम अर मंदिरु क नौं पर समिति अर ट्रस्ट नी बणै साकली।