चारधाम मा जातरियौं कु स्वागत जय गंगोत्री, जय यमुनोत्री, जय बदरी विशाल अर जय केदार बोलि कि कर्यें ज्यां

देरादूण। चारधाम जातरा खूंणि बणि नियमावळि कु 100 फीसदी पालन हूंण चैंद। हेलीकॉप्टर कु टिकक ब्लैक करण वळों पर कारवै हूंणि चैंद, केदारनाथ अर यमुनोत्री धाम मा ध्वड़ा, खच्चरू क खाणु-पीणु अर अराम करणा कु पूरू बन्दबस्त हूंण चैंद या बात पर्यटन, लोक निर्माण, सिंचाई, पंचायतीराज, ग्रामीण निर्माण, जलागम, धर्मस्व एवं संस्कृति मंत्री सतपाल महाराजन आज बुधवार खूंणि उत्तराखण्ड सचिवालय कु वीर चन्द्र सिंह गढ़वाळि सभागार मा चारधाम जातरा क तय्यरि थैं लेकैकि उर्यीं समीक्षा बैठक मा बोलि।

महाराजन बोलि कि चाधाम जातरा मा क्वीं लापरवै नीं हूंण चैंद। पर्यटन मंत्री न बोलि कि जातरा क बाटौं मा एसडीआरएफ, पुलिस, जल पुलिस, गोताखोर, अर ट्रैफिक पुलिस कु बन्दबस्त हूंण चैंद।
महाराजन बोलि कि जातरा मा आण वळि गाड़ियौं क लगातार चेकिंग कर्यें ज्यां। अर होटळु, ढाबौं मा, खाण-पिणा अर रैंणा कु बन्दबस्त क रेट लिस्ट लग्यें ज्यां। महारजन धाम मा खुटटौं की मालिस करणा कु बन्दबस्त करणा का निर्देश बि दीं।

महाराजन बोलि कि मानव उत्थान सेवा समिति क जरिया चारधाम जातरा मा आण वळा जातरियों कु 10 करोड़ रुप्यौं कु बीमा बि कर्यें जाळु।

बैठक मा महाराजन बोलि कि चारधाम जातरा मा आण वळा जातरियौं कु स्वागत जय गंगोत्री, जय यमुनोत्री, जय बदरी विशाल अर जय केदार बोलि कि कर्यें ज्यां।

समीक्षा बैठक मा गढ़वाल कमिश्नर सुशील पर्यटन सचिव सचिन कुर्वे, वी. मुरुगेसन, सी.रविशंकर क दगड़ विभागीय अधिकारी भि छायीं