चंपावत उपचनौं, मुख्यमंत्री धामीन दिखें अपड़ि तागत

मुख्यमंत्री पुष्कर सिंह धामी न उपचुनौं क तय्यरि शुरू कैरि याली। आज चंपावत पौंचिक मुख्यमंत्री न बनबसा बटि टनकपुर तक रोड शो कायी। जैका बाद धामी न चंपावत की रैवासियों थैं अपिड़ बात बोलि। मुख्यमंत्री न ब्वाल कि चंपावतक रैवासियों पर उंथैं पूरू भरोसु च कि यखक रैवासी उथैं अपडु आशीर्वाद द्याला। दगड़ा दगड़ि उन्न चंपावत क मनखियों थैं यू भरोसु भि दीलै कि ऊं चम्पावत के विकास मा कुई कमी नि कारला।

बतै दियां कि चंपावत के विधायक कैलाश गहतोड़ी न मुख्यमंत्री खूंणि अपड़ि सीट छोड़ि छै।

आज मुख्यमंत्री चंपावत बटि अपड़ा उपचुनौ क शुरूआत कैरि द्यायी। उन्न बनबसा बटि टनकपुर तक 8 किलोमीटर लम्बु रोड शो खुल्ळा जीपि मा कायी। सड़क्यिों मा चंपावत क मनखियों न फूल माला से मुख्यमंत्री कु आदर सत्कार कायी। चंपावत के मनखियों आदर सत्कार से मुख्यमंत्री क मुखड़ि मा चलक्वार ऐ ग्यायी। मुख्यमंत्री बौत खुस दिय्खेणा छायी।

ऐ मौका फर मुख्यमंत्री न बोलि कैलाश गहतोड़ी न सब्यौं से पैलि मि खूंणि अपड़ि सीट छ्वड़ना कु फैसला कायी, मि कैलाश गहतोड़ी अर चम्पावत क रैवासियों क जिकुड़ि से आभार ब्वलदु। मुख्यमंत्री न बोलि आज मि तुमर बीच मा छौ, अर मिथैं ईं बातै पूरू भरोसु च कि मिथैं तुमरू पैल्यक जन दगडु़ पर माया मिलदि राली।

मुख्यमंत्री बोलि कि प्रधानमंत्री उत्तराखण्ड थैं एक आदर्श राज्य बणाणा कु काम करणा छन। अर आण वळु दशक उत्तराखण्डु कु विकास कु दशक होलु या मा कैथैं भि कु शक नि हूंणि चैंद।

मुख्यमंत्री न बोलि कि टनकपुर -बागेश्वर रेल लैन कु सर्वे खूंणि 29 करोड रूपयों पास ह्वैग्यी। खटीमा बाईपास बणाण से चंपावत पिथौरागढ़ क रैवासियों कु जात्रा आसान ह्वै जाली।

ऐ मौका फर अल्मोड़ा क सांसद अजय टम्टा, धामी खूंणि कुर्सी छ्वड़न वला विधायक कैलाश गहतोड़ी, विधायक राम सिंह क़ैड़ा, अर बौत बड़ी संख्या मा चंपावत क रैवासी छायीं।