चंपावत जिला उत्तराखण्ड कु ज्यूं च, चंपावत तैं ‘मॉडल जिला’ बणौंणा वास्ता खळाखळ काम हूंणा छन: धामी
मुख्यमंत्री धामिन चंपावत जिलक विकास वास्ता 115.23 करोड़ रुप्यौं से बणण वलि 43 विकास योजनौं कु लोकार्पण अर शिलान्यास कायी।
जीजीआईसी चंपावत मा उर्यूं कार्यक्रम मा मुख्यमंत्रिन 51.37 करोड़ा रुप्यौं की 22 योजना कु लोकार्पण अर 63.86 करोड़ रुप्यौं की 21 योजनौं कु शिलान्यास कायी अर बोलि कि या योजना चंपावत जिलक विकास वास्ता खास छन अर आर्दश चंपावत कु स्वींणा तैं सच करणा दिसम छन।
मुख्यमंत्रिन बोलि कि चंपावत जिला उत्तराखण्ड कु ज्यूं च अर ये जिला तैं प्रदेस कु ‘मॉडल जिला’ बणौंणा वास्ता खळाखळ काम करे जाणा छन। उन्न बोलि कि प्रदेस सरकार कु पैलु काम च कि हरेक तोकम गुणवत्तापूर्ण विकास करे ज्यां।
मुख्यमंत्रिन अधिकारियों तैं निर्देश दींन अर बोलि कि जौ योजना कु शिलान्यास करे ग्यायी, यूं कामु तैं बगत फर अ गुणवत्ता से पूरू करे जालु।
ये मौका पर मुख्यमंत्री न इस्कुल्यां नौंनियौं दगड़ि खाणा बि खायी। मुख्यमंत्रिन ऊंका दगड़ि छ्वीं लगैनि अर पढ़ै का बारम चरचा कायी।
मुख्यमंत्रिन जीजीआईसी ऑडिटोरियम मा आत्मनिर्भर भारत संकल्प अभियान मा आत्मनिर्भर भारत, नशामुक्त समाज, स्वच्छता, जल संरक्षण अर आर्दश चंपावत बणौंणा वास्ता डिजिटल दस्तखत करनि।
ऐ मौका फर दायित्वधारी श्याम नारायण पांडे, अनिल डब्बू, शंकर कोरंगा, जिला पंचायत अध्यक्षआनंद अधिकारी, नगर पालिका अध्यक्ष श्रीमती प्रेमा पांडे, ब्लॉक प्रमुख श्रीमती अचला बोहरा, ब्लॉक प्रमुख श्रीमती सीमा आर्या, भाजपा जिला अध्यक्ष गोविंद सामंत, भाजपा प्रदेश मंत्री निर्मल मेहरा अर पैल्यक विधायक पूरन सिंह फर्त्याल अर हौरि लोग बि छायीं।