चमोळी जिला मा जल्दी दूर ह्वैळी मोबाइल कनेक्टिविटी क समस्या
भाजपा का राष्ट्रीय मीडिया सदस्य सतीश लखेड़ा न एक प्रेस विज्ञप्ति जारी कायी। प्रेस विज्ञप्ति जारी करदा उन्न ब्वाळ कि कर्णप्रयाग अर गैरसैंण मा मोबाइल कनेक्टिविटी क समस्या थैं लेकैकि राज्यसभा सांसद अनिळ बळूनी न केन्द्रीय संचार मंत्री से भेंट कायी।
सतीश लखेड़ा न ब्वाळ कि बळूनी न केन्द्रीय मंत्री थैं बतै कि गैंरसैण अर कर्णप्रयाग क दूर दराज क जगों मा मोबाइळ मिळणा मा परेशानी हूंद जै कारण से नौंन्याळु क पढ़ै क नुकसान हूंण च। लखेड़ा न ब्वाळ कि सांसद बळूनी न कर्णप्रयाग क विकासखण्डों क बगोली, चमोला, मैखुरा, मजखोला, कमेड़ा और सेरागढ़ अर गैरसैंण विकासखंड क देवपुरी, राईकोट, कुनीगाड़ तल्ली, कुणखेत, बुखाली, चोरड़ा, पिंडवाली और कांसुवा मा फोन क समस्या क बारा मा बात कायी।
केन्द्रीय मंत्री अनिळ वैष्णव न यूं दूर दराज जगों मा संचार क व्यवस्था थैं ठीक करणा खूंणि बीएसएनएल क अधिकारियों थैं निर्देश देदीं।
लखेड़ा न केन्द्रीय मंत्री अर अनिळ बळूनी क आभार ब्वाळ अर ब्वाळ कि संचार सुविधा क् ठीक हूंण से वखक रैवासियों अर स्कूळ क नौन्याळु थैं पढ़े मा बौत फैदा ह्वाळु।