कैबिनेट मंत्री थैं अपड़ि हि स्वास्थ्य व्यवस्था पर नि च भरोसु

कैबिनेट मंत्री क रेखा आर्य न सोशल मीडिया अपड़ि एक फोटो पोस्ट कायी। पोस्ट मा रेखा आर्य न लेखि कि आज बाबा श्री बनखण्डी नाथ जी क कृपा अर आप सब्बियों देवतुल्य सोमेश्वर वासियों प्रदेसवासियों, शुभचिंतकों व संबंधीगणों क आशीर्वाद व शुभकामनाओं ळ मैक्स हॉस्टिपल दिल्ली मा म्यारू ऑपरेशन सफल ह्वै ग्यायी। आप सब्बियों थैं बौत-बौत धन्यवाद्। मि जल्दी ठीक ह्वै कैकि आप सब्बि के सेवा मा तत्परता क दगड़ दूबरा काम करळु।

रेखा आर्य क ईं पोस्टळ प्रदेस मा एक नै बहस छेड़ी द्यायी। अर सर्या तरफ या बहस हूंणि च कि क्या उत्तराखण्ड क मंत्रियों थैं अपड़ि हि स्वास्थ्य व्यवस्था पर भरोसु नि च?

रेखा आर्य कै दिन बटि बिमार छायीं। ऊं थैं पुट्गा मा रसौळी क कारण परेशानी हूंण छै। जादा तब्यत खराब हूंण क बाद रेखा आर्य न नै दिल्ली क मैक्स असपताल मा अपडु़ आपेरशन करैं। ईं यू कारण च जै से प्रदेस के स्वास्थ्य व्यवस्था पर सवाल खड़ा हूंणा छन। प्रदेस सरकार स्वास्थ्य व्यवस्था थैं लेकैकि बड़ा-बड़ा दाव करणि च लेकिन अपड़ा मंत्रियों क इलाज भि नि कैरि सकड़ि च?

सवाल यों कि एम्स, हिमालयन, मैक्स, दून मेडिकल जन असपताल राज्य मा कै खूंणि छन, अर कैकु इलाज करणा छन? सवाल यों च कि क्या हमर प्रदेस क कैबिनेट मंत्रियों थैं अपड़ि स्वास्थ्य व्यवस्था पर भरोसु नि च? आखिर किलै एक सरौळी जन बीमारि क आपरेशन खूंणि ऊंथैं दिल्ली जाण प्वड़नु च, जबकि रसौळी क आपरेशन दून मेडिकल कॉलेज मा भि ह्वै सकदु। सवाल यों भि च कि क्या प्रदेस क असपताल गरीब मनखियों क जिंदगि थैं हि बचै सकदि न कि कैबिनेट मंत्रियों क जिंदगि थैं?

साफ च कि सरकार स्वास्थ्य सेवाओं थैं कतगा भि अच्छु कैरि दे लेकिन प्रदेस क खास मनिखयों थैं खास कैकि मंत्रियों थैं अपड़ि स्वास्थ्य सेवा पर भरोसु नि च। मंत्री जी आप बौत जल्दी ठीक ह्वै ज्यां, इन्न भगवान से प्रार्थना च लेकिन हम खूंणि इन्न तत्परता से काम करणा क जरूरत नि च जै तुमथैं भरोसु नि च।