प्रदेसम मंत्रीमण्डल विस्तारा ह्वे भिवड़ाट तेज

देरादूण। मुख्यमंत्री धामीक दिल्ली बिटि लैटिकि औंण पर प्रदेसम दुबरा भिवड़ाट सुरु ह्वेग्ये। त वखि भाजपा के भितर कैबिनेट विस्तार थैं लेकैकि भिवड़ाट तेज ह्वेग्ये।बतै जाणु च कि निकाय चुनौ से पैलि प्रदेसम मंत्रीमण्डल कु विस्तार ह्वे सकदु।

यीं बडु कारण छायीं कि प्रदेसा विधायक खळाखळ दिल्ली भजणा छायीं। गढ़वाल मण्डल क सांसद अर विधायक जादा टकटुकु (सक्रिय) हूयां छायीं अर हाईकमान पर दबौव बणाणा छायीं।

भाजपा प्रदेश अध्यक्ष महेन्द्र भट्ट कु कार्यकाल पूरु हूंणूं च या खुणि बि दबौब बणै जाणु छायीं। बतै दियां की प्रदेसा मुख्यमंत्री अर केन्द्र मंत्री कुमौ बिटि छन। प्रदेसा मंत्री मण्डलम 4 मंत्री गढ़वाल बिटि त जैमा सतपाल महाराज, धन सिंह रावत, प्रेमचंद्र अग्रवाल, गणेश जोशी त विधानसभा अध्यक्ष ऋतु खंडूरी गढ़वाल मण्डल बिटि छन।

तीरथ सिंह रावत, सांसद नरेश बंसल, अर हरद्वार सांसद त्रिवेन्द्र सिंह रावत अबि प्रधानमंत्री क दगड़ि मुखाभेंट कायी। त दुसर तरफि रमेश पोखरियालन अमित शाह दगड़ि मुखाभेंट कायी। त यांका बाद मुख्यमंत्री दिल्ली पौंछिग्येन। धामी न दिल्ली म केंन्द्रीय मंत्री, सांसद बलूनी दगड़ि मुखाभेंट कायी।

दिल्ली जाण से पैलि मुख्यमंत्री न जन पैल्यक कैबिनेट मंत्री मदन कौशिक, अरविंद पाण्डेय, बंशीधर भगत , बिशन सिंह चुफाल अर कै हौरि विधायकु दगड़ि मुखाभेंट कायी। यां से कैबिनेट विस्तार छ्वीं हूण बैठिग्यीन। जन मुख्यमंत्री खळाखळ दिल्ली दरबारम हाजिरी लगौंणा छन वा से साफ च ब मुख्यमंत्री बि दबौब म छन।

अब भवैष्यम क्य होलु यु त भवैष्य पुटगा म च। पर या बात व साफ प्रदेस राजनीति म भितरा भितर कुछ त पकणु च। खबर च कि कैबिनेट बदलि तैं लेकैकि मंत्रियों का विभाग तक बदलि करै जै सकदन, त मुख्यमंत्री बि अपणा कांधौं बिटि विभागु कुु भार तैं बि कुछ कम कै सकदन।