ब्लैकलिस्टेड कम्पनी थैं दिये ग्ये, वन दरोगा भर्ति इम्तयान क जिम्मेबरि

देरादूण। उत्तराखण्ड अधीनस्थ सेवा चयन आयोग पेपर लीक अर सचिवालय रक्षक दल मामला मा अब यूकेएसएसएससी क पैल्यक सचिव अर सेवानिवृत्त परीक्षक क दगड़ मा पांच अधिकारी पर ह्वै सकद जांच। ऐ मामला मा एसटीएफ न पुलिस मुख्यालय क जरिया उत्तराखण्ड शासन थैं चिट्ठी लेखि जांच करणा क विनीति कायी। यांक बाद बत्यें जाणु च बल अब शासन ऐ मामला जा उच्च स्तरीय जांच करणा खूंणि त्यारि करणु च।

जाणकारी च बल एसटीएफ न सबूतों क अधार पर आयोग क पैल्यक सचिव संतोष बडोनी अर रिटायर्ड परीक्षक नारायण सिंह डांगी क दगड़ तीन अनुभाग अधिकारी पर जांच करणा क मांग कायी।

दूसरि तरफ खबर च 2021 सितम्बर क मैना मा वन दरोगा ऑनलैन भर्ति क मामला मा भि उत्तराखण्ड अधीनस्थ सेवा चयन आयोग अफसरू पर शक च। किलैक आयोग न जै कम्पनी एनएसईआईटी थैं ऑनलैन वन दरोगा भर्ति के जिम्मेबरि दे छायीं। वा कम्पनी मध्य प्रदेश क व्यापम घोटाळा मा 2021 अगस्त बटि ब्लैक लिस्ट छायीं। यांक बाद भि आयोग न सितम्बर 2021 मा कम्पनी थैं ऑनलैन इम्तयान कराणा क जिम्मेबरि दे।

ईं वु कारण च एसटीएफ थैं आयोग क अफसरू पर शक च। इन्न मा आयोग क अफसर पर जांच ह्वै सकद।