बागेश्वर उपचुनौ म भाजपा तैं मिलि जीत

देरादूण। बागेश्वर उपचुनौ मा भाजपा क पार्वती दास न कांग्रेस क बसंत कुमार तैं 2810 बोटु से हरै दे।

बागेश्वर उपचुनौ म भाजपा प्रत्याशी पार्वती दास क चुनौ जितणा क बाद पार्टी कार्यकर्ता खुस छन वखि भाजपा प्रदेश अध्यक्ष महेन्द्र भट्ट अर विधायक मदन कौशिक न मुख्यमंत्री धामी थैं मिट्ठै खिलै।

आज सुबेर 8 बजि बोटु गिनती सुरू ह्वै। बोटु क गिनती मा पैलि कांग्रेसा बसंत कुुमार अगनै चलणा छायीं पर जन्नि एक-एक चरण कैकि गिनती बढ़णि छायीं उन्नि उन्नि भाजपा अगनै जाणि छायीं। 11 वुं चरणा बाद भाजपा खुशी मनौंण बटि ग्यें।

बागेश्वर उपचुनौ मा कांग्रेसा बंसत कुमार, भाजपा बटि पार्वती देवी, यूकेडी क अर्जुन कुमार देव, सपा क भगवती अर उपपा क भगवत कोहली मैदान मा छायी।
भाजपा प्रत्याशी पार्वती तैं 32192 अर कांग्रेसा बसंत कुमार थैं 29382 बोट प्वड़िन। यूकेडी, समाजवादी पार्टी अर और उत्तराखंड परिवर्तन पार्टी क उम्मैदवार त हजार बोट तक बि नीं पौंछि साका जबकि नोटा तै 1257 बोट प्वड़िन।

उपचुनौ जितण बाद पार्वती दास न बोलि कि स्वं. चन्दन राम दासा बागेेश्वर तोक मा कर्या विकासा काम अर मुख्मयंत्री धामी क कामुुु से जनता बौत खुस च। जनता न विकासा कामुु तैं जितै, अब यु बि बागेश्वरा विकास खूंणि काम कारली अर जनता उं फर जु भरोसु कायी वै तैं पूूरू कारली।