भाजपा विधायक कु भै 40 ज्यूंदा कारतूसा दगड़ि पकड़े ग्यायी, कांग्रेसन खड़ा करिन सवाल
देरादूण। भाजपा विधायक कु भै क दगड़ि द्वी लोगु तैं भारत नेपाल इंटरनेशनल बॉर्डर पर एसएसबी न 40 ज्यूंदा कारतूसौंक दगड़ि पकड़ि। एसएसवी न सब्यौं तैं बनबसा पुलिस तैं दे द्यायी।
वखि ऐ मामला म अब प्रदेसम राजनीति सुरु ह्वेग्ये। भाजपा सरकार पर सवाल खड़ा हूंणा छन। कांग्रेसा प्रदेस अध्यक्ष करन माहरा अर हरीश रावतन भाजपा अर प्रदेस सरकार पर सवाल खड़ा करिन।
करन माहरा न बोलि कि पाप कु घड़ा अब भ्वोरि ग्ये। उन्न बोलि बल भाजपा विधायक कु छ्वटु भुल्ला तैं अंतरराष्ट्रीय बॉर्डर पर सशस्त्र सीमा बल क 57वीं वाहिनी न 40 अवैध ज्यूंदा कारतूसौं क दगड़ि पकड़ि। माहरा न बोलि कि घटना क बाद प्रशासन अर पुलिस विधायका भै तैं बचौंणा म लगिग्ये। उन्न बोलि कि ब्वलें जाणु च कि प्रशासन न वैथैं लैसेंस दिखौंणा खुणि बोलि। उन्न सवाल कायी कि क्य क्वीं कारतूस लेकैकि दूसर देस जै सकदु?
क्य देसा सीमा तैं पार करै जै सकदु? उन्न बोलि भाजपा प्रदेस तैं कख लिजाणि च? आज यीं बात तैं समझणा जरुरत च। उन्न प्रदेसा लोगु से यीं जुल्म कु एक ह्वेकैकि विराध करणा मांग कायी।
त वखि ऐ मामला म पैल्यक मुख्यमंत्री हरीश रावतन बोलि कि माओवाद कु पूरणु इतिहास तैं देखिकि या घटना बौत चिंताजनक च। ऐ मामला तैं प्रदेस सरकार अर केन्द्र सरकार दबौंणा कोसिसम लगिग्ये।
उन्न बोलि कि नेपाल बॉर्डर से लग्यूं जिला न पैलि हि यीं बातिकि चिंता कै छायीं कि बॉर्डर पर अवैध गतिविधि हूंणि छन जु आज सै साबित ह्वेग्ये।
ऐ बाराम उन्न बोलि कि कांग्रेस प्रदेसा लोगु तैं बिंगालि (समझाएगी)। उन्न बोलि कि दरकार होलि त कांग्रेस हौरि सबूत जमा कैकि राज्यपाला दगड़ि मुखाभेंट कारली।