बिना ब्योळा-ब्योळि क ह्वै ब्यो

पौड़ी सतपुळी मा एक ब्यो इनों ह्वै जख मा न त ब्योळा छायी अर न ब्योळी।

ऐ ब्यो मा न त ब्योळी पौंछी अर न ब्योळा। इन्न मा परिवार अर गौ वळों न ब्योळी अर ब्योळा क जगमा नर्युळ (श्रीफल) थैं ब्योळी अर ब्योळा मानिक पूरा विधि विधान से ब्यो करै द्यायी।

दरसळ ह्वै इन्न च कि सतपुळी मा जखनोळी गौं मा 18 अर 19 तारिक अप्रैळ मा ब्यो हूंण छायी। ब्योळा दिल्ली मा नौकरी करदु छायी। ब्योळा जब ब्यो खूंणि घौर आणु छायी त वैळ अपड़ि कोरोना जांच करायी त रिपोर्ट पाॅजिटिव आयी। जैक बाद वु दिल्ळी मा हि रूकि ग्यायी। त दूसर तरफ ब्योळी थैं भि थैं कोरोना क लक्षण लगणा छायी । जैका कारण से ब्योळा अर ब्योळी अपड़ा ब्यो मा नि ऐ साका। तब द्विया परिवारों ळ फैसळा कायी कि बिना ब्याळो अर ब्योळी क विधि विधान से ब्यो त करैं ही जावा।

गौ का मनखि अंकित न बतै कि ब्यो मा नरूयुळ थैं ब्योळा अर ब्योळी मानिक ब्यो पूरू करै ग्यायी।
पौड़ी जिळा मा ऐ ब्यो चार्या तरफ चर्चा हूंणि च।