कांग्रेस तैं बडु झटका मथुरा दत्त जोशीन थामी भाजपा कु झण्डा

निकाय चुनौ अबि सुरु बि नीं ह्वे की कांग्रेस तैं बडु झटका लगिग्ये। कांग्रेस बड़ा नेता मथुरा दत्त जोशी न कांग्रेस छोड़ि याली। मथुरा दत्त जोशी कांग्रेस बड़ा नेतौं मा छायीं। उन्न निकाय चुनौ मा अपणि घरवळि खुणि पिथौरागढ़ बिटि मेयर कु टिकट मांगि छायीं। वु तैं उमेद छायीं कि इगता सालु तक कांग्रेसा सेवा करणु कु फल ऊंतैं मिललु, पर इन्नु नी ह्वे। यां से नराज मथुरा दत्त जोशी न कांग्रेस बिटि इस्तीफा दे अर आज मुख्यमंत्री धामिक समणि भाजपा कु झण्डा थामी।

मथुरा दत्त जोशी न निकाय चुनौ मा सबि उम्मेदवारू तैं मिल्यां टिकटु पर हस्ताक्षर करिन अर अपिण घरवळि तैं टिकट नीं मिलण से नराज ह्वेकैकि पार्टी बड़ा नेतौं खिलाप अवाज उठै। यां से पैलि अल्मोड़ा सीट बिटि मेयर टिकट मंगण वला बिट्टू कर्नाटकन बि अर जगत सिंह खाती न बि निकाय चुनौ से पैलि भाजपा कु झण्डा थामी।

कुमौ बिटि औंण वला यु नेतौं क भापजा मा जाण से हरीश रावत हाम कांग्रेस भितर कम ह्वेग्ये किलैकि हरीश रावत बि कुमा बिटि औंदन अर कुमौ बिटि कांग्रेस कु सर्या दारौमदार हरीश रावत कांधौं पर हि छायीं। कांग्रेसा यु तिन्या बड़ा नेतौं क भाजपा म जाण से कांग्रेस से जादा झटका हरीश रावत तैं लगि।