भोळे जी महाराज अर माता मंगळा जी राज्य क भैळ खूंणि हमेसा खड़ा रन्दन : पुष्कर सिंह धामी

देरादूण। मुख्यमंत्री पुष्कर सिंह धामी न अपड़ा घार (मुख्यमंत्री आवास) मा हंस फाउण्डेशनळ प्रदेस की दींईं 30 एम्बुलेंसों थैं झण्डा दिखेंकि रवान कायी।

हंस फाउण्डेशन क् संस्थापक भोले जी महाराज क जन्मबार पर हंस फाउण्डेशन प्रदेस क दूर दराज मा रैंण वळा रैवासियों खूंणि 30 एम्बुलेंस, 500 ऑक्सीजन सिलेण्डर दीं।

मुख्यमंत्री पुष्कर सिंह धामी न श्री भोळेजी महाराज क जन्मबार पर ऊथैं बधै द्यायी अर ब्वाळ कि उत्तराखण्ड प्रदेस के रैवासियों खूंणि या सौभाग्य क बात च कि श्री भोळे जी महाराज अर माता मंगळा जन मनखि हमर दगड़ मा छन। जु खैरिक (संकट) बगद मा राज्य क भैळ खूंणि हमेसा हमर दगड़ मा खड़ा रन्दन। ऊंकु आशीष अर दगडु़ हमेसा राज्य थैं मिळणु रैंद।

मुख्यमंत्री न ब्वाळ कि प्रदेस सरकार प्रदेसक रैवासियों थैं चिकित्सा अर स्वास्थ्य सेवाऔं थैं दिंणा खूंणि कृत संकल्प च।
अर हमरा ये संकल्प मा हंस फाउण्डेशन हमेसा हमर दगड़ा मा खडु़़ रैंद। उन्न ऐ काम खूंणि माता मंगळा जी अर भोळेजी महाराज क आभार ब्वाळ। अर ब्वाळ कि हंस फाउण्डेशन प्रदेस क विकास मा अपडु़ सहयोग हमेसा हमथैं देंणु रैंद।

ऐ मौका पर कैबिनेट मंत्री गणेश जोशी, डॉ. धन सिंह रावत अर हंस फाउण्डेशन का विकास वर्मा मौजूद छायी।