भाजपा विधायकु क भितरघात क आरोपु क बाद भाजपा हाईकमान क खुल्ळिन आंखा

चुनौं कु रिजळट आणा मा अब्बि बौत दिन छन लेकिन14 तारिक मा चुनौं खत्म हूंण का बाद से हि भाजपा का घपरौळ मच्यूं च। भाजपा के विधायक चुनौं खतम हूंण दिन से हि मीडिया क समणि एैकि अपणि नाराजगी अर या बात बतौंणा छन कि ऊथैं अपड़ों न हि चुनौं मा हराणा कु काम कायी। भाजपा क मुसिकळ अब या च कि या बात दिल्ली तक पौंचि ग्यायी। जैका बाद भाजपा हाई कमान न ऐ मामळा मा अब रिपोर्ट मांगि याळी।

यां मा सबसे बड़ि बात या च कि लक्सर क विधायक अर भाजपा प्रत्याशी त भाजपा प्रदेस अध्यक्ष पर हि आरोप लगाणा छन। यिं बडु़ कारण च कि भाजपा क भितर घपरोळ मच्यूं च। भाजपा पार्टी थैं अब ईं बातकु भि डौर च कि कखि औरि विधायक भि अब अपणु गिच्चु नि ख्वळयां। भाजपा थैं भि अब इन्नों लगण बट्ठि ग्यायी कि कखि ईं बातळ चुनौं मा नुकसान त नि ह्वै।

बतै दिय्यां कि चुनौं खतम हूंणा क बाद भाजपा के तीन विधायकु न अप्फु थैं हरौणा का आरोपा पार्टी क हि लोक्खु पर हि लग्यें। जै मा लक्सर का विधायक संजय गुप्ता न त भाजपा प्रदेस अध्यक्ष मदन कौशिक पर हि ऊथैं हराणा क आरोप लग्यें। दूसरा विधायक कैळाश गहतोड़ी चम्पावत मा पार्टी क कार्यकर्ताओं पर हि भितरघात क आरोप लगाणा छन। त काशीपुर विधायक हरभजन सिंह चीमा न अपड़ा नौंना थैं हराणा क आरोप भाजपा पर हि लग्यें। ईं कारण च भाजपा क भितर हि सियासी घपरौळ मच्यूं च।

विधायकु क आरोपु क बाद भाजपा न प्रदेस संगठन मंत्री थैं जाचं करणा खूंणि बोळि याळी। भाजपा हाईकमान न सब्यूं थैं मीडिया से दूर रैंणा खूंणि बोळि याळी। वखि मुख्यमंत्री धामी न भि ये मामळा मा सब्बियों से जाणकारी ल्यायी। आरोप प्रदेस अध्यक्ष पर लग्यां छन त ब्वळें त इन्न जाणु च कि भाजपा न अब ऐ मामळा थैं हल्का मा नि लिंणु।