बदरीनाथ विधानसभा उपचुनौ, नाक (प्रतिष्ठा) कु सवाल ह्वेग्ये
विधानसभा उपचुनौ म उत्तराखण्डा द्वी सीट मंगलौर अर बदरीनाथ पर चुनौ हूणिन।
चमोली जिला की बदरीनाथ सीट ही छायीं ज्वा कांग्रेसम छायीं। लोकसभा चुनौ क बीचम राजेन्द्र भण्डारी न विधानसभा क सदस्यता बिटि इस्तीफा द्यायी अर कांग्रेस कु हत्थ छेाड़िकि भाजपा म चलिग्यींन। इल्लै बदरीनाथ सीट खाली ह्वेग्ये।
अब जब द्विया विधानसभौं म उपचुनौ क तय्यरि सुरु ह्वेग्ये अर आचार संहिता लगि ग्यायी। त कांग्रेस अर भाजपा द्वियों पार्टिम मंगलौर अर बदरीनाथ सीट बटि जिताऊ उमेदवारु क खोज सुरु ह्वेग्ये।
कांग्रेसा तैं बदरीनाथ सीट पर पर नै उमेदवार ख्वजण प्वाड़णु च। कांग्रेस तैं इन्न उमेदवार चैंणु च जु राजेन्द्र भण्डारी अर महेन्द्र भट्टा द्वियौं कु एक दगड़ि मुकाबला कै सक्यां। कांग्रेसा समणि सबसे बड़ी चुनौती हि या च कि कांग्रेस तैं बदरीनाथ सीट मा द्वी उमेदवारु दगड़ि चुनौ लड़ण।
या बात हम इल्लै ब्वना छौ कि 2022 विधानसभा चुनौ मा राजेन्द्र भण्डारी न भाजपा क उमेदवार महेन्द्र भट्ट तैं लगभग 2000 बोटु से हरै छायीं। इन्न मा बदरीनाथ सीट राजेन्द्र भण्डारी से जादा महेन्द्र भट्ट खूणि नाक (प्रतिष्ठा) कु सवाल बणिग्ये। महेन्द्र भट्ट चुनौ हरणा बाद भाजपा प्रदेश अध्यक्ष त अबि राज्य सभा सांसद छन। जै से या बात त साफ च कि भाजपा राजेन्द्र भण्डारी हि चुनौ क मैदान मा उतरिण च।
बड़ी बात या च लोकसभा चुनौ म राजेन्द्र भण्डारी क बूथ बिटि भाजपा तैं कांग्रेस से कम बोट मिलिन। ज्वां भाजपा तैं झकौळणि च, त कांग्रेस तैं अबि बिटि जितक भुज्यांण आण बैठिग्ये। उन्न बि लोकसभा चुनौ म भाजपा न कांग्रेसा बीच ज्वां तोड़ फोड़ कायी, कांग्रेस वांकु बदल बि लिंण चाणि च। कांग्रेेसा तैं सबसे जादा यीं बातिकि परवा (चिंता) च की समिण एक न बल द्वी उमेदवार छन।
कांग्रेस तैं जख एक नै उमेदवार भरोसु पर चुनौ मैदान जितण प्वाड़लु। वखि राजेन्द्र भण्डारी क बाद कर्यां त वु पुरण खल्विार छन, उन्न भाजपा कर कांग्रेस द्विया पार्टियों क खूब नौणि खयीं च।
यीं कारण च बदरीनाथ सीट म मुकाबला मजदार अर द्वियौं (कांग्रेस-भाजपा) क समणि हार जीत कु सवाल कम अर नाक (प्रतिष्ठा) कु सवाल जादा ह्वेग्ये।