बदरी-केदार मंदिर समिति अध्यक्ष अर पुरोहित अमणि-समणि

बदरी-केदार मंदिर समिति क अध्यक्ष फर एक दा दुबरा तीर्थपुरोहित पिरपिरा हूंया छन। अबि कुछ दिन पैळि मंदिर समिति न कुछ सुझौव दे छायीं। जैमा पुरोहतौं तैं एक जन लारौं (कपड़ा) मा पूजा अर दान दक्षिण लिंणा मा रोक लग्यें जाणा कु सुझौं छायीं। जैथैं लेकैकि पुरोहित समाज पिरपिरु हूंयू च अर अजय अजेन्द्र तैं अंजाम भगुतण खूंणि चितौंणा च।

बतै दियां कि बदरी केदार मंदिर समिति कु एक टोळा तिरुपति बालाजी, वैष्णो देवी मंदिर, महाकाल अर सोमनाथ मंदिर कु बन्दुबस्त तैं देखिकि ऐ। वै टोळान मंदिर समिति तैं सुझौं दे। जैमा श्रद्धाळुयौं तैं दर्शनकरणा बाद तीर्थ पुरोहितौं तैं दक्षिणा देंणा मा रोक लग्यें जाणा कु प्रस्ताव सामिल च। ईं वा बात च, जै से तीर्थ पुरोहित नराज छन। तीर्थ पुरोहित संतोष त्रिवेदी न बोलि कि केदार मंदिर समिति क अध्यक्ष अजय अजेंद्र मंदिर कु बन्दबसत तैं दय्खणा कु अपडु काम कर्यां अर पड़ा पुरोहितौं क मामळा मा बीच मा नी प्वड़यां त अच्छु च। उन्न बोलि कि हक हकूकों क दगड़ मा छेड़ि त्रिवेन्द जन्नि भारी प्वोड़ि सकदि। उन्न बोलि कि देवस्थानम बोर्ड तैं खतम करणा क बाद समिति क अध्यक्ष तीर्थ पुरोहितौं क हक हकूक तैं चुछ्णा क कोसिस करणा छन जै थैं कतै सहन नी कर्यें जाळु।

त वखि बदरी केदार मंदिर समिति के अध्यक्ष न बोलि कि मंदिर समिति अर प्रशासन क तरफ बटि मंदिर प्रबंधन मा सुधार खूंणि कोसिस कर्यें जान्द अर कुछ ळोग बिना बातिकु विवाद खडु करणा छन। उन्न बोलि कि कुछ अपडु फैदा खूंणि नी चान्दा कि मंदिरा बन्दबस्त मा क्वीं सुधार कर्यें ज्यां।