विधानसभा अध्यक्ष ऋतु खंडूडी न हंस फाउण्डेशन क संस्थापक माता मंगला अर भोले जी महाराज से कोटद्वारा क विकास खूंणि मदत मांगि
देरादूण। विधानसभा अध्यक्ष ऋतु खंडूडी न हंस फाउण्डेशन क संस्थापक मंगला माता अर भोले जी महाराज क दगड़ ऊंका घौर जैकि मा भेंट कायी।
ऐ मौका फर विधानसभा अध्यक्षान कोटद्वार विधानसभा तोक क विकास क बारा मा हंस फाउण्डेशन क जरिया मदत देंणा क माता मंगला जी से विनती कायी। माता मंगला न भि कोटद्वारा विकास खूंणि अपड़ि मदत देंणा कु भरोसु दे।
विधानसभा अध्यक्षान हंस फाउण्डेशन से कोटद्वार विधानसभा तोक मा स्कुळु मा पाणिक टंकी, नौन्याळु क पढै़ खूंणि स्कुळ मा नै कमरा, स्कुळ मा टैलस लगौंण, पुरणा कमरौं थैं ठीक करणा, स्कुल मा पुस्तकालय जन्न कामु खूंणि मदत देंणा कु बोलि।
विधानसभा अध्यक्षान बोलि कोटद्वार मा बाबा सिद्धबली कु मंदिर क दगड़ मा कण्वाश्रम मा राजा दुष्यन्त अर शकुंतला क नौनु भरत कु जलम भि ह्वै छायीं। जख ऋषि कण्व आश्रम च अर जख सम्राट भरत की छ्वटा मा शिक्षा ह्वै छायीं। उन्न कोटद्वारा क पछ्याण अर रौंतेळु बणाणा खूंणि कोटद्वारा मा जगा-जगा किसम-किसम के मूर्ति लग्यें जाण खूंणि भि मदत मांगी।
ऐ मौका फर माता मंगला न कोटद्वार मा स्कुळु क हालत सै करणा अर कोटद्वार मा विकासा काम करणा खूंणि अपड़ि तरफ बटि पूरि मदत देंणा कु भरोसु दे।