‘अपणि सरकार’ पोर्टल क सबि सेवा अब घौर मा हि मिललि, मुख्यमंत्रीन दिख्यें झण्डा

देरादूण। मुख्यमंत्री धामीन आज अपणि सरकार नागरिक सेवा आपके द्वार योजना तैं झण्डा दिखें कि कायी रवाना। मुख्यमंत्री धामीन आज छंचर खूंणि मुख्यमंत्री कैम्प कार्यालय मा ‘अपणि सरकार ’ नागरिक सेवाएं आपके द्वार योजना तैं झण्डा दिख्यें।

अब देरादूण क रैवासियौं तैं एक फोन पर अपणि सरकार पोर्टल क सबि नागरिक सेवा घौर मा हि मिललि। मुख्यमंत्री न बोलि कि प्रदेसा ळोगु तैं ऊंका घौर मा जन सेवा केन्द्रा जरिया सेवा दियें जाणा क सुरुवात ह्वैग्यें। या सेवा अब झट प्रदेसा दूसर जिलौं मा बि सुरु कर्यें जाली।

मुख्यमंत्री न बोलि कि सरकार क काम च कि नागरिक सेवौं कु फैदा सबि ळोगु तैं ऊंका घौर मा हि मिल्यां। अबि 575 सेवा ऑनलैन अपणि सरकार पोर्टल पर छन। अबि या सेवा देरादूणा 100 वार्डौं मा सीएससी केन्द्र क जरिया दियें जाली। सूचना प्रौद्योगिकी, सुराज, अर विज्ञान प्रौद्योगिकी विभाग क जरिया आई.टी.डी.ए. न ‘डोर स्टेप डिलीवरी खूंणि सी.एस.सी एस.पी.वी तैं या जिम्मेबरि दियीं च। देरादूण मा सीएससी चलौंण वलौं तैं पुलिस जांच क बाद पछ्याण पतर दियेंग्यीन। यीं सेवा कु फैदा 18009110007 टोल फ्री नंबर फर फोन कैकि बि लिये जै सकदू। अब घौर मा आवेदन लिये जाला अर सबि प्रमाण पतर अभिलेख घौर मा हि दियें जाला।

सचिव शैलेश बगौली बतै कि यी सेवा क तीन मैना बाद समीक्षा कैकि सर्या प्रदेस मा सेवा दियें जाली।
आई.टी.डी.ए. निदेशक श्रीमती नितिका खण्डेलवाल न जाणकारी द्यायी कि सी.एस.सी. क जरिया केंद्र अर राज्य सरकार सेवाओं क अलावा औरि व्यावसायिक सेवा जन बीमा, शिक्षण, बैंकिंग, पेंशन, डिजी पे, टेली हेल्थ बि लोगु तैं गौं मा हि मिलि जाली।
ऐ मौका फर विधायक शिव अरोरा, सचिव शैलेश बगौली, विनोद कुमार सुमन, आई.टी.डी.ए. निदेशक श्रीमती नितिका खण्डेलवाल, अपर निदेशक आई.टी.डी.ए. गिरीश चंद्र गुणवंत, आईटीडीए अर सीएससी-एसपीवी उत्तराखण्ड क अधिकारी छायीं।