अपड़ा खुटौं मा खडु़ हूंण कु मंतर . . .

प्रधानमंत्री नरेन्द्र मोदी न उत्तराखण्ड मा बाबा केदार अर भगवान बदरीनाथ क दर्शन करणा क बाद जातरा फर आण वला जातरियों से विनती कायी कि जु भि जातरी जातरा मा आणा छन वु अपड़ि जातरा मा हूंण वला खर्चा कु 5 प्रतिशत, जख भि वु जातरा मा ज्यां छन, वखक घरया (लोकल) समान थैं मूल्यांण पर खर्चा कर्यां। प्रधानमंत्री न बोलि तुम जख भि जातरा मा जाणा छा, पुरी ज्यां, कश्मीर ज्यां या सोमनाथ ज्यां कखि भि ज्यां, एक सौं लियां बल तुम जतगा भि खर्चा जातरा पर करणा छा वैकु 5 प्रतिशत खर्चा वखकु बणि घरया समान मूल्यांण पर कर्यां। अगर तुमरा घौर मा यु समान पैळि बटि च , अपड़ा लोगु थैं भेंट मा दियां। उन्न बोलि कि इन्नु करण से वै तोक (क्षेत्र) मा लोगु थै। इतगा काम मिळि जालु कि तुमथैं बिसवास भि नी होळु।

प्रधानमंत्री क ईं कोसिस क जतगा भि बढ़ै कर्यें ज्यां कम च। दूर पाड़ मा बस्याँ गौ अर वख रैंण वळा मनखि, जख जिन्दगि जिंणु असान नीं च, जख काम धाम न क बराबर छन। वखक रैवासियों थैं वखि काम मिळि ज्यां, अर ऊथैं अपडु समान क दाम वखि मिळि ज्यां या से जादा खुसी क बात दूर पाड़ मा रैंण वळा गौ क रैवासियों थैं औरि क्या ह्वै सकदन।

प्रधानमंत्री ईं विनीति फर प्रदेस क मुखिया पुष्कर सिंह धामीन दीवळी क मौका फर अपड़ि गाड़ी रोकिक बाटा मा माटा क दीया मुल्यें। जै कि जगता भि बढ़ै कर्यंे ज्यां कम च। मुख्यमंत्री कि या छ्वटु सी कोसिस ‘घरया (वोकल फॉर लोकल) बणयां समान थैं अगनै बढ़ौंणा अर छ्वटा छ्वटा व्यापारियों थैं अपड़ा काम अर अपड़ा समान थैं अगनै बढ़ौंणा खूंणि प्रेरणा देलि। यांक दगड़ मा हमथैं यु भि स्वचण प्वाड़ळु कि हमथैं घरयां समान थैं अगनै बढ़ौंण हि ना, बल्कि हमथैं वु समान फर गर्व अर उंकु प्रचार भि करण प्वाड़ळु।

हमथैं यु भि याद रखण प्वाड़ळु कि हमरि या छ्वटि से कोसिस घरया समान थैं अगनै बढ़ौंणा मा मदद हि नी करदि बल्कि समान बणाैंण वळों थैं अपड़ा खुटौं मा खडु़ हूंण ताकता क दगड़ा-दगड़ि ऊं से जुड़याँ, ऊंकी कुटुम्दरि थैं भि कटकुटु (मजबूत) बढ़ौंणा कु मंतर भि च।