अंकिता क बुबा न बोलि एसआईटी सै जांच नीं करणि च

श्रीनगर: अंकिता कु कतल थैं द्वी मैना ह्वैग्यीं पर अबि तक दोषियों थैं सजा नीं ह्वै। जै से अंकिता क कुटुम्दरि अर प्रदेस के रैवासियों मा नराजगी च। अंकिता क बुबा न एसआईटी क जांच रिपोर्ट पर भि सवाल खड़ा करीं। उन्न बोलि कि ऐ मामला मा सरकार कुछ नीं करणि च। उन्न बोलि कि उथैं शक च कि वनंत्रा रिसोर्ट मा जै वीआईपी कु नीं बत्यें जाणु च, वु भाजपा या संघ से जुड्यूं ह्वै सकदु। उन्न बोलि तबि सरकार वै वीआईपी कु नौं थैं बतौंणा मा डरणि च।

अंकिता क बुबा आज श्रीनगर मा पौंचि। जख उन्न गढ़वाल विश्वविद्यालय क छात्र नेताऔं क दगड़ मा भेट कायीं अर अपड़ि जिकुड़ि कि या पिड़ा बोलि।

अंकिता क बुबा अर कुटम्दरि न सरकार पर आरोप लग्यें अर सरकार से ऐ मामला मा दोषियों कु नार्को टेस्ट अर सीबीआई जांच करणा क मांग कायी।

अंकिता क बुबा न बोलि कि प्रदेस क मुखिया अर सबि बड़ा से बड़ा अफसरू क दगड़ बात ह्वै अर सब्यौं न बोलि कि जांच ह्वैळी अर दोषियों थैं सजा मिललि पर अबि तक कुछ नीं ह्वै। उन्न बोलि कि अब न मुखिया पुच्छणु च अर न एसआईटी वळा हि ऐ मामला मा सै जांच करण छन।

अंकिता क बुबा न बोलि कि ऐ मामला मा अबि वीआईपी कु नौं समणि नी ऐयीं। उन्न बोलि जरूर ऐ मामला मा क्वीं बड़ु आदमि कु हाथ च। त दूसर तरफ विवि क नेतौंन बोलि ऐ मामला मा अंकिता थैं निसाब दिलौंणा खूंणि सड़क्यिों मा आंदोलन कर्ये जालु।