केदारनाथ तीर्थ पुरोहित कु आरोप : गर्भगृह मा लग्युं सुनु ह्वैग्यें पितळा कु , सवा अरब रुप्यौं कु घपरोल

श्री केदारनाथ मंदिर क गर्भगृह मा लग्यूं सुना क प्लेटु फर अब एकदा दुबरा सवाल खड़ा हूंणा छन। केदानाथ क तीर्थ पुरोहित ब्वना छन कि केदारनाथ मंदिर क गर्भगृह मा जु सुना क क प्लेट लग्यीं छायीं वु अब पितळ मा बदलें ह्वै ग्यींन।

चारधाम महापंचायत उपाध्यक्ष अर केदारनाथ क तीर्थ पुरोहित आचार्य संतोष त्रिवेदी कु एक वीडिया सोशल मीडिया मा रिटणु च। वायरल वीडिया मा संतोष त्रिवेदी यु आरोप लगौंणा छन बल केदारनाथ मंदिरा गर्भगृह क पाळियों मा लग्यूं सुनु अब पितळा मा बदलि ह्वैग्यें। उन्न अधिकारि अर मंदिर समिति फर आरोप लग्यें कि बोलि कि गर्भगृह मा सवा अरब रुप्यौं कु घपरौळ ह्वै।

संतोष त्रिवेदी न बोलि कि पैळि बटि मंदिर क गर्भगृह मा सुनु लगौंणा कु विरोध करणा छायीं, यांका बाद बि जबदस्ती वख सुनु लग्यें ग्यें। अर अब या बात पता चलि कि सुनु क नौं फर पितळा कु पाणि चढ़यें ग्यें। संतोष त्रिवेदी न बोलि कि यांकी जांच हूंण चैंद अर जु बि दोषी छन ऊ फर कारवै हूंण चैंद।

त वखि या क बारा मा केदारनाथ मंदिर समिति कु ब्वन च कि गर्भ गृह के पाळियौं मा सुुनु लगौंणा कु काम साल 2022 मा एक दानदाता न कै छायीं।

अर अबि एक आदिम न एक वीडियो सोशल मीडिया मा डाळि कि ब्वनु च कि 1,15,00,00,000.00 (रु. एक अरब पन्द्रह करोड़ मात्र ) रुप्यौं कु सुनु मंदिर क गर्भगृह मा लग्यें ग्यें जु की साफ झुठ च अर बिना जाणकारि क भक्तु क भावनौं तैं भड़कौंणा क काम कर्यें जाणु च।

यांका बारा मा श्री बदरीनाथ-केदारनाथ मंदिर समिति न अपड़ि बात बोलि कि श्री केदानाथ मंदिर मा गर्भगृह मा एक दानदाता न 22,777.800 ग्राम सुनु लग्यें ग्यें। जैकि अबि कीमत 14.38 करोड़ रुप्या च अर ऐ काम खूंणि कॉपर प्लेट कु भार 1,001,300 किलोग्राम च, जैकि कीमत 29,00,000.00 (रु. उनतीस लाख मात्र) रुप्या च। उन्न बोलि श्री बदरीनाथ केदारनाथ मन्दिर समिति ऐ मामळा मा सोशल मीडिया मा रिट्णु वीडियों क खण्डन करद अर जै न यु वीडियों तैं फैल्यें वै फर नियमा क अनुसार कारवै कर्यें जाली।