हरद्वार कुम्भ 2027सा सबि काम अक्टूबर 2026 तक पूरा करे ज्यां : मुख्यमंत्री
हरद्वार कुम्भ म्यळा की त्यारि बारम आज मुख्यमंत्री धामिन एक बैठक कायी। मुख्यमंत्रिन बोलि कि भव्य अर दिव्य कुंभ उर्यें जालु, उन्न बोलि म्यळा क्षे़त्रम जु बि काम छन वु मास्टर प्लान तैं देखिकि करे जाला।
मुख्यमंत्रिन बोलि कि हरद्वार कुम्भ म्यळा 2027 क जु बि काम छन वु अक्टूबर 2026 तक पूरा कर ज्यां।
मुख्यमंत्रिन बोलि कि म्यळा राजि खुसी हूंया यां का वास्ता सरकरि जमीन अर सड़कियों बिटि कब्जा हट्ये ज्यां।
मुख्यमंत्रिन बोलि कि यूआईआईडीबी हरद्वार गंगा कॉरिडोर म जु बि काम करणि च, कुंभ म्यळा से पैलि पूरा हूंण चैंद।
उन्न बोलि बहादराबाद-श्यामपुर बाईपास तैं फटाफट पूरु करे ज्यां। इन्नि श्यामपुर, गैंडीखाता अर चण्डीघाट क्षेत्रम टेंट लगाणा वास्ता मास्टर प्लान त्यार करे ज्यां। मुख्यमंत्रिन बोलिकि कुंभ तोकम यातायात अर पार्किग कु बन्दुबस्त करे ज्यां।
मुख्यमंत्रिन बोलि खैड वास्ता जीरो वेस्ट कॉन्सेप्ट पर काम करे ज्यां। कुंभ तोकम अपशिष्ट प्रबंधन, डस्टबिन, रीसाइक्लिंग सिस्टम अर मोबाइल टॉयलेट कु पूरु बन्दुबस्त करे ज्यां। गंगा क छाळ अर घाटु पर 24 घंटा सफै की बन्दुबस्त करे ज्यां। अर हरकी पैड़िम आरती क बगत लोगु खुणि बैठणा वास्ता पूरु बन्दुबस्त करे ज्यां।
मुख्यमंत्रिन बोलि लोगुक सुरक्षा खुणि हरेक घाटर पर लाइफगार्ड, सुरक्षा ज्यूडू (रस्सी) अर मोटर बोट त्यार हूंण चैंद।
मुख्यमंत्रिन बोलि यां कु खास ध्यान दिये ज्यां कि श्रद्धालु उत्तराखण्ड बिटि खुस ह्वेकैकि ज्यां, यांका वास्ता ऊंका दगड़ि हमरु व्यौहार अच्छु हूंण चैंद।
मुख्यमंत्रिन बोलि कि म्यळा तोकम स्वास्थ्य सबि सुविधा चंख हूंण चैंद। म्यळा क्षेत्रम अस्पताल, एम्बुलेंस अर मोबाइल चिकित्सा दल त्यार रैंण चैंद।
बैठकम विधायक मदन कौशिक, प्रेमचंद अग्रवाल, आदेश चौहान, श्रीमती रेनू बिष्ट, रवि बहादुर, श्रीमती अनुपमा रावत, मुख्य सचिव आनंद बर्द्धन, डीजीपी दीपक सेठ, प्रमुख सचिव आर. के सुधांशु, एल फेनई, आर मीनाक्षी सुंदरम, सचिव शैलेश बगौली, नितेश झा, डॉ. पंकज पांडेय, डॉ. आर राजेश कुमार, धीराज सिंह गर्ब्याल, युगल किशोर पंत, मेलाधिकारी श्रीमती सोनिका अर वर्चुअल गढ़वाल कमिश्नर विनय शंकर पांडेय, आईजी गढ़वाल राजीव स्वरूप जिलाधिकारी छायीं।