फौज बटि रिटैर हूंण क बाद फौजी न खोलि नाई क दुकान

असम रैफल बटि रिटैर ह्वै कैकि मोहन सिंगन कुछ अलग ही करण कि सोचि। मोहन सिंह एक नै मिसाल पेश कायी। रुद्रप्रयाग, भरदार क रैवासी मोहन सिंह रावत मार्च 2023 मा रिटैर ह्वीं। रिटैर हूंणा बात मोहन सिंह कुछ अलग करणा क सोचि अर कारगी, देरादूण मा “भूतपूर्व सैनिक नाई की दुकान” क नौ से दुकान खेालि। दुकनी कु भैर लग्यूं बोर्ड सोशल मीडिया खूब वायरल हूंणु च।

मोहन सिंह न बतै कि जब उन्न या बात अपड़ि घरवळि अर नौन्याळु तैं बतै त उन्न या मा ऊंकी मदत कायी। उन्न बोलि कि उन्न फौज पर रैन्द बाल कटणु सीखी छायीं अर ऊंथै बाल कटणु बौत अच्छु लगदु अर काम क्वीं छ्वटु अर बड़ु नी हून्दु। उन्न बोलि कि हमरा ज्वान नौना शहरु कु तरफ भगणा छन, या से अच्छु त वु अपणु काम धाम करदा। उन्न बोलि कि फौज बटि रिटैर हूंण क बाद फौजी सिरफ चौकीदरि करणा क स्वचदु पर मिन त पैळि सोचि याली छायीं कि समाज मा रैकि कुछ अलग काम कर करळु।

मोहन सिंह अबि दौड़वला देरादूण मा रैंणा छन। मोहन सिंह रावत क एक नौनु अर एक नौनि च। उन्न बोलि कि रिटैर हूंणा क 10 दिन बाद हि मिन काम सुरू कै दे। उन्न बोलि बल अबि काम नै च अर मिथैं कुछ जादा पता नी च पर मिथैं भरोसु च कि मि ये क्षेत्र मा बि बौत अच्छु काम करळु।

बुन्दक चलौंण वळा हत्थ अब कैंची चलौंणा छन यांकी चौतर्फा छ्वीं हूंणि छन अर सबि मोहन सिंगा क बढ़ै करणा छन।