आपद प्रभावित क्वीं बि अप्फु तैं यखुलि नी समझ्यां, सर्या प्रदेस तुमर दगड़ि खडु च: धामी
मुख्यमंत्री धामिन आज पौड़ी गढ़वाळ आपदा तोक सैंजी जैकि वखकि दसा देखि। ऐ मौका फर उन्न आपदा प्रभावित क्षेत्रा नुकसान बारम जाणकारी ल्यायी। मुख्यमंत्रिन प्रभावित तैं या उमेद द्यायी कि सरकार ऊंका दगड़ि खड़ी च।
मुख्यमंत्री न जिलाधिकारी पौड़ी गढ़वाल तैं निर्देश दींन कि आपदा प्रभावित लोगु तैं मदत पौंछाणम क्वीं कमी नी हूंण चैंद। यां से पैलि मुख्यमंत्रिन हेलीकौप्टर बिटि थलीसैंणा बांकुड़ा अर हौरि प्रभावित तोक कु ह्वै सर्वे कायी। मुख्यमंत्रिन नौठा मा बुरॉसीम प्रभावित लोगु से मुखाभेंट कायी अर आपदा प्रभावित पांच लोगु तैं राहत राशि क चेक बि दींन। ऐ मौका फर लोगुन मुख्यमंत्री तैं अपणि दिक्कतु का बारम बतै अर मदत देंणा वास्ता मुख्यमंत्री कु आभार बोलि।
मुख्यमंत्रिन आपदा प्रभावितों तैं बोलि कि आपदा कु ऐ बगत मा क्वीं बि अप्फु तैं यखुलि नी समझ्यां उन्न बोलि कि सर्या प्रदेस पीड़ितौं क दगड़ि खडु च।
मुख्यमंत्रिन निर्देश दींन कि जादा बरखन हूयां नुकसान वांका बारम सर्या जाणकारी लिऐ ज्यां अर बोलि कि गौं वलों तैं दुसर जगा भ्यजें ज्यां। उन्न बोलि कि राहत केन्दु मा बिजली, पाणि, दवै, रासन कु बन्दुबस्त करे ज्यां। यांका दगड़ि उन्न वाडिया इंस्टीट्यूटा जरिया सर्वे करणा निर्देश बि दींन।
ऐ मौका फर कैबिनेट मंत्री डॉ. धन सिंह रावतन मुख्यमंत्रिन कु धन्यवाद बोलि हर लोगु तैं दुसर जगा बसणा वास्ता एक समिति बण्यें ज्यां।
वखि जिलाधिकारी न बतै कि हरेक गौं तक प्रशासन टीम पौंछणि च, सबि लोगु तैं राहत दिये जाली।