अब क्या होळु उज्याडू बल्द कु ?

6 साळ खूंणि भाजपा पार्टी बटि भैर निकळे ग्यीं हरक सिंह रावत आज चौबाट मा ख़डा ह्वै ग्यीं। ऊंथैं अब समझमा नि आणु च कि अब जाण च त कै बाटा जाणा।

चार साळ मा भाजपा क सर्या उज्याण खैं कि हरीश रावत कू उज्याडू बल्द चौबाट बटि जन्नै जाण चाणु च, वु बाटु सीधा अर सीधा कांग्रेस पार्टी का म्वार (दरवाजा) पर जांद। अर हरक सिंह रावत क बड़ि समस्या हि या च कि म्वार पर हरीश रावत लांट्ठु लैकेकि बैट्ठयां छन।

हरक सिंह रावत त हुंकारर लगाणा छन, लेकिन अब्बि कांग्रेस पार्टी ऊथैं अब्बि घास नि दींणि च। ईं बात हरक सिंह रावतक जिकुड़ि थैं झुरौंणि च। अर अब हरक सिंह बिना शरता क कांग्रेस मा आणा खूंणि त्यार छन।

दूसर तरफ हरीश रावत ब्वना छन कि हरक पैळि कांग्रेस छव्णन क अपणि गळती थैं मान ळीं, त पार्टी मा ऊंकु स्वागत करणा खूंणि त्यार छन। उन्न ब्वाळ कि हरीश रावत क्या चाणा छन ईं बात कु कुईं महत्व नि च। उन्न ब्वाळ कि जादा जरूरी बात या च कि पार्टी क्या चाणि च अर क्या स्वचणि च। उन्न ब्वाळ कि प्रदेस क मंशा क्या च? तब्बि फैसळा लिय्यें जाळु।

वखि कांग्रेस उत्तराखण्ड क प्रदेस अध्यक्ष गणेश गोदियाळ ब्वळणा छन कि हरक सिंह रावत क पार्टी मा आणा से पार्टी थैं फैदा ह्वाळु, लेकिन यांकू फैसळा हरीश रावत अर पार्टी हाईकमान थैं हि लिंण प्वड़ळु।

अब हरीश अर गणेश गोदियाळ क ब्यानुळ साफ ह्वै जादा क हरक सिंह रावत खूंणि अब्बि कांग्रेस क म्वार (दरवाजा) खलपट खुळण वळा नि छन।

साफ च कि कांग्रेस अब्बि ऊथैं आसानि से माफ करण वळि नि च, इन्न मा अब हरीश सिंह रावत क उज्याडू बल्द कु क्या होळु यू त बगत हि बताळु।

लेकिन अब्बि त हरक सिंह रावत 2022 विधान सभा चुनौ मा कांग्रेस थैं जितौंणा क माळा जपणा छन।