आशारोड़ी मा डाळ कटणों कु ह्वै विरोध, बोण थैं बचौंण कु द्यायी रैबार

दिल्ली देरादूण एक्सप्रेस-वे बणाणा खूंणि मोहंड अर आशारोड़ी मा डाळा कटे जाणा छन। अब्बि कु दिन पैलि यख डाळों क कटान शुरू ह्वै। जन्नि डाळौं क कटान शुरू ह्वै उन्नि देरादूण के रैवासियों ने यांकु विरोध शुरू कैरि द्यायी। यांका बाद भि आशारोड़ी मा डाळा कटणा कु काम नि रव्कें ग्यायी।

आशारोड़ी क बोण (वन/जंगल) थैं बचााणा खूंणि आज सिटीजन फॉर ग्रीन देरादूण अर एसएफआई, उत्तराखंड महिला मोर्चा, हिंद स्वराज, द अर्थ एंड क्लाइमेट चेंज इनीशिएटिव, भारत की जनवादी नौजवान सभा, आगास, पराशक्ति, अखिल गढ़वाल सभा, राज्य आंदोलनकारी मंचन विरोध कायी।

विरोध करणा वळों न अपड़ा हत्थु मा तकती पकड़ि छायी। जै पर डाळा बचौंणा के स्लोगन लख्यां छायीं। प्रदर्शनकारियों डाळौं थैं बचौंणा खूंणि लगातार नारा बाजी कायी अर जनगीत भि लग्यें। एसएफ आई न ‘मुक्ति क मार्ग’ नामकु एक नुक्कड़ नाटक खेळि अर बोण थैं बचौंण कु रैबार द्यायी। प्रदर्शनकारियों न बोणों थैं बचाणा कि अर प्रकृति थैं नुकसान नि पौंचाणा क कसम भि खायी।

ऐ मौका मा प्रो. रवि चोपड़ा, कमला पंत, निर्मला बिष्ट, मनोज ध्यानी, हिमांशु चौहान, शैलेन्द्र परमार, सत्यम, त्रिलोचन भट्ट ,जयदीप सकलानी, डॉ. आंचल शर्मा, जगदंबा प्रसाद मैठाणी, रुचा सिंह, जया, गुणानंद जखमोला, मनोज कुंवर, प्रकाश नेगी, रिद्धि, वर्षा सिंह छायीं।