आम आदमी पार्टी क बसंत कुमार अर भैरवनाथ टम्टा न थामी कांग्रेस कु हत्थ
बागेश्वर। बागेश्वर उपचुनौं तैं लेकैकि अब सियासी पारा गरम ह्वैग्यें। जख ब्यालि कांग्रेसा रंजीत दास न भाजपा कु झण्डा थामी छायीं। त आज कांग्रेसन आम आदमी पार्टी पैल्यक उपाध्यक्ष बसंत कुमार अर पैल्यक प्रत्याशी भैरवनाथ टम्टा तैं कांग्रेस मा शामिल कै याली।
बतै दियां कि बागेश्वर उपचुनौं मा कांग्रेस अर बीजेपी क्वीं कसर छ्वड़णा खूंणि त्यार नीं च। ब्यालि भाजपा न कांग्रेस रंजीत दास तैं भाजपा मा शामिल कै छायीं, त आज कांग्रेस न आम आमदी पार्टी क घौर मा द्वळणु कै द्यायी। कांग्रेस आज आम आमदी पार्टी क बंसत कुमार अर भैरव नाथ तैं अपड़ा समर्थकौं क दगड़ कांग्रेस मा सामिल कै याली। कांग्रेस प्रदेश अध्यक्ष करन माहरा अर यशपाल आर्य न द्वियौं तैं कांग्रेस सदस्यता दिलै।
खबर इन्न आणि च कि कांग्रेस व्यखुनी दा तक अपड़ा प्रत्याशी क घोषणा कै सकद। कांग्रेस न एक बागेश्वर उपचुनौं तैं लेकैकि एक बैठक कायी। जैमा उन्न प्रत्याशी कु नौं फर मंथन कायी।
बैठक मा कांग्रेस प्रदेश अध्यक्ष करन महरा, नेता प्रतिपक्ष यशपाल आर्य, पैल्यक सांसद प्रदीप टम्टा, ललित फर्स्वाण, हरिश ऐठानी, महेंद्र लूंठी, राजेंद्र टंगड़िया, गीता रावल, लोकमणी पाठक,जिलाध्यक्ष भगवत सिंह डसीला अर गोपा धपोला, डॉ. उमा शंकर छायीं।