भाजपा न श्रीनगर बटि शुरू कायी जन आशीर्वाद यात्रा

श्रीनगर। भाजपा न 2022 मा हूंण वळा चुनौ क त्यारि शुरू कैरि याळी। आज श्रीनगर गढ़वाळ बटि मुख्यमंत्री पुष्कर सिंह धामी न अपणि सरकारक कामु थैं प्रदेस का रैवासियों तक पौंचाणा खूंणि जन आशीर्वाद यात्रा शुरू कैकि 2022 मा हूंण वळा चुनौ कु शंख बज्जै द्यायी।

मुख्यमंत्री न ब्वाळ कि भाजपा बिना त्यारू-म्यारू कैकि विकास क काम करणि च। उन्न ब्वाळ कि प्रदेस सरकारळ ज्वान नौंनु अर ब्यटुळों क भलईं खूंणि कैईं योजनओं पर काम करणि च । उन्न ब्वाळ जौ योजनाओं पर हम काम करण छौं ऊंसे नया वाटा त्यार हूंणा छन। मुख्यमंत्री न ब्वाळ कि 2022 चुनौ मा प्रदेस क जनता हमथैं अपणु आशीर्वाद देंणा खूंणि त्यार च।

ऐ मौका पर मुख्यमंत्री न श्रीनगर थैं नगर निगम बणाणा क घोषणा भि कायी अर ब्वाळ यां से श्रीनगर कु विकास ह्वाळु।

मुख्यमंत्री न ब्वाळ कि पौड़ी बटि ऊंकु जन्मकु रिश्ता च। अर ये रिरता थैं मि कभि भि भुळि नि सकदू, पौड़ी मेरी जन्म अर कर्म भूमि द्विया च।

ऐ मौका मा भाजपा प्रदेस अध्यक्ष, मंत्री सतपाल महाराज, डॉ. हरक सिंह रावत, धन सिंह रावत मौजूद छायी।