लोनिवि मंत्री न द्यायी रानीपोखरी मा टुट्याँ पुल क जांच करणा क आदेश

देरादूण। प्रदेस क पर्यटन, लोक निर्माण, सिचाई धर्मस्व अर संस्कृति मंत्री सतपाल महाराज न देरादूण-ऋषिकेश हाईवै पर राीनपोखरी मा टुट्याँ पुळ का मामळा मा जांच का आदेश दे दिईं।

प्रदेस मा भारी बरखा हूंणि च, जै कारण से देरादूण अर ऋषिकेश थैं जव्ड़न वळु रानीपोखरी पुळ कु एक भाग आज दिनमा 12 बजि पाणी मा बोग्यीं ग्यायी।

घटना का जाणकारी मिळण फर हि एसडीआरएफ अर एनडीआरएफ क टीम मौका पर पौंचि ग्यीं अर बचाव अर राहत काम शुरू कैरि द्यायी।

ऐ मामळा मा सतपाल महाराजन झट प्रमुख अभियंता लोक निर्माण विभाग हरिओम शर्मा थैं बस्गाळ क कारण टुट्याँ रानीपोखरी पुळ का दगड़ा-दगड़ि प्रदेस का सब्बि पुळों थैं जंचणा का आदेश भि देदीं। महाराजन निर्देश दीं कि ऋषिकेश हाईवे मा दुसरू रस्ता (वैकल्पिक मार्ग) यातायात खूंणि त्यार करैं ज्यां। सतपाल महाराजन पुळिस महानिदेशक अशोक कुमार क दगड़ फोन पर बात कायी अर रानीपोखरी मा टुट्यां पुल पर यातायात थैं बंद करणा खूंणि ब्वाळ।

सतपाल महाराजन सिंचै विभाग का प्रमुख अभियंता मुकेश मोहन थैं बस्गाळ मा प्रदेश क सब्बि जल विद्युत परियोजनाओं पर नजर रखणा खूंणि ब्वाळ।