सरकार देवस्थानम बोर्ड एक्ट मा बदळाव क तरफदार च, उच्चस्तरीय कमेटी ह्वैळी गठित
सोहन सिंह रावत
उत्तरकाशी। उत्तरकाशी मा मुख्यमंत्री न पत्रकारों दगड़ मा भेंट कायी। मुख्यमंत्री न पत्रकारू थैं बते कि सरकार देवस्थान बोर्ड एक्ट मा बदळाव करणा क तरफदार च। उन्न ब्वाळ कि पैळि यां खूंणि एक उच्च स्तरीय कमेटी बण्यें जाळी। जै का बाद फैसळा करै जाळु।
मुख्यमंत्री न ब्वाळ कि देवस्थानम बोर्ड का बारा मा तीर्थ पुरोहित ऊॅसे लगातार बात करणा छन।
मुख्यमंत्री न ब्वाळ कि बोर्ड थैं लेकैकि तीर्थ पुरोहित अर हक हुकूकधारिया मा एक डैर च। मुख्यमंत्री ब्वाळ कि उथैं लगणु च कि सरकार मंदिरों पर अपड़ा कब्जा मा लिणीं च।
मुख्यमंत्री न ब्वाळ कि हमरि मंशा चर्या धामों मा सै बन्दबस्त बणाणा क च।
उन्न ब्वाळ कि मेरू मनण च कि हमथैं आर्थिक काम काज थैं नै त्रौं से करण चैंद, जै से वखाक दुकादारों पर अर हुककधारियाें क हकों पर कुईं गळत असर नि प्वड़या।
उन्न ब्वाळ सब्बि हुककधारियों दगड़ हमन बात कैरि याळी। अर हमरि सरकार देवस्थानम बोर्ड थैं सै दिशा मा बदळण खूंणि त्यार च।
मुख्यमंत्री न ब्वाळ कि चार धाम प्रदेस खूंणि बौत महत्वपूर्ण छन। चार धाम से प्रदेस क सब्बि जातियों क मनखि क जस अर विकास जुड़यां छन।