उत्तराखण्ड प्रदेस मा नै मुख्यमंत्री क तय्यरि ह्वै शुरू, तीरथ सिंह द्याळा इस्तीफा

UK Dinmaan

तीन दिन बटि राजधानी दिल्ली मा चौकड़ी जैमा कि बैठ्यां मुख्यमंत्री देरादूण पौंचि ग्यीं। या से पैळि मुख्यमंत्री न 24 घण्टा क भितर दुसर बार आज भाजपा अध्यक्ष जे पी नड्डा दगड़ मा भेंट कायी।

नड्डा का घार मा मुख्यमंत्री क् या मुखाभेंट से इन्न दगत मा ह्वै जब उंकी मुख्यमंत्री क कुर्सी दाव पर लगीं छायीं अर चरि तरफ मुख्यमंत्री क् भविष्य थैं लेकैकि सियासी छुईं लगणि छायीं।

ब्याळी बटि सतपाळ महाराज अर धन सिंह रावत थैं दिल्ली मा बुळौंण का बाद से प्रदेश मा असाढ़ का मैना क पतण से जादा सियायी तपण चलिण छायी।

यांकु कारण यौं च कि मुख्यमंत्री तीरथ सिंह रावत थैं 10 सितम्बर तक विधान सभा क सदस्य बणाण प्वड़ळु। अबि प्रदेश मा द्वी सीट गंगोत्री अर हल्द्वानी खाळी छन। राज्य मा अगळि साळ फरवरी, मार्च क मैना मा चुनाव हूंणि जैमा केवळ पांच-छै मैना बच्यां छन। इन्न मा जाणकार मनखियों क ब्वळण च कि उपचुनौ करणौं का फैसळा निर्वाचन आयोग पर च। अर सितम्बर तक प्रदेस मा उपचुनौ नि हूंण से भाजपा हाईकमान क बरमण्ड मा चिंता साफ दिख्येंणि छायीं।

दूसर तरफ बतै इन्न जाणू च राज्य सरकार अर प्रदेश भाजपा संगठन क बारा मा जु खबर भाजपा हाई कमान थैं मिळणि छायीं वां से भाजपा हाई कमान खुस नि छायीं। अर इन्न मा तीरथ सिंह क नेतृत्व मा 2022 क चुनौं मा भाजपा जाणा खूंणि त्यार नि छायीं।

अब खबर इन्न आणी च क सतपाळ जी महाराज अर डाॅ. धन सिंह रावत थैं अब्बि दिल्ली मा रव्कै ग्यायी। त दूसर तरफ तीरथ सिंह रावत न देरादूण पौंह्चण क बाद राज्यपाळ से मिळणा कु बगद मांगी याळी। जै से या बात सच साबित ह्वै ग्यायी कि प्रदेश मा एक दा दुबरा मुख्यमंत्री बदळे जाण क त्य्यरि च। अब सिफर मुख्यमंत्री प्रेस वार्ता कू इन्तजार च बस।