दुकानदार नाराज, त शासकीय प्रवक्ता सुबोध उनियाळ न ब्वाळ सरकार थैं ‘कर्फ्यू’ ळगाणा मा कुईं खुशी नि हूंणि च

देरादूण। प्रदेश मा कोरोना संक्रमण कम हूंण का बाद भि प्रदेश सरकार कर्फ्यू मा राहत नि दींणि च। बजार नि खुळण से ठरठरू (नाराज) हूयां दुकानदारू न आज राजधानी देरादूण क् सड़क्यिों मा अपड़ि नराजगी जतै।

आज घण्टाघर मा दून व्यापार मंडळ न सरकार थैं अपणि नराजगी दिक्खै। दूकानदारू न ब्वाळ कि कर्फ्यू क् कारण 40 दिन बटि हमरि दुकान बन्द छन। उन्न ब्वाळ कि सरकार अपणि मनमानी करणि च अर फैसळा लिणीं च। सरकारळ एक दा बि हमरि परेशान समझणा क कोशिश हि नि कायी। उन्न ब्वाळ कि इन्नु ळगणु च कि जन सत्ता मा बैठ्यां लुक्खु थैं कैकि पेरशानी क कुईं चिन्ता हि नि च।

एक तरफि जख बजार नि खुळण से नाराज दुकानदार सड़क्यिों मा छन त दुसर तरफ प्रदेश का शासकीय प्रवक्ता सुबोध उनियाळ टक ळगैकि ब्वळा क सरकार थैं कर्फ्यू लगाणा मा कुई खुशी नि हूंणि च।

उन्न ब्वाळ हम प्रदेश क स्थिति थैं दय्खणा छाैं, वैका बाद हि फैसळा ह्वाळु। उन्न ब्वाळ सरकार कैकि दबाव मा नि आणीं वळी। हां 8 जून बटि थ्वड़ा राहत दियें जै सकदी, जै थैं लेकैकि विचार करैं जाळु।

उन्न ब्वाळ क सरकार स्वचणीं च क् पैळि जिळों मा विकाखण्ड स्तर पर समीक्षा करै ज्यां, तब जख जादा संक्रमण च वैथैं छौड़िक औरि विकासखण्डु़ मा छूट दे सकदी।

उन्न ब्वाळ कि सरकार कैकु दबाव मा नि च, सरकार फैसळा जनता क सुरक्षा थैं देख्कि करै कारळी।