मुख्यमंत्री क सुरक्षा घेर झड़कैकि समणि पौंचि ग्यीं आशा अर आंगनबाड़ी कार्यकत्री

कोरोना काळ मा द्वीं बरसु बटि धकाधक (लगातार) गौं-गौं अर सैरू मा काम करण वळि आशा अर आंगनबाड़ी कार्यकत्रियों क टणाक (नाराजगी) मुख्यमंत्री समणि ऐग्यायी।

मुख्यमंत्री उत्तरकाशी क् नौ गौं मा सीएचसी सेन्टर क जाणकारी लिंणा छायी तबि बिण्डि संख्या मा आशा अर आंगनबाडी कार्यकत्री मुख्यमंत्री क सुरक्षा घेर थैं झड़कैकि (तोड़कर) मुख्यमंत्री समणि पौंचि ग्यीं। उन्न मुख्यमंत्री मा अपणि तनखा अर कोरोना काळ मा कै भि प्रकार क सुविदा नि मिळणक शिकैत कायी।

सिरड़ी (नाराज) आशा अर आंगनबाड़ी कार्यकत्रियों ळ मुख्यमंत्री से ब्वाळ कि कोरोना काळ मा हम गौं अर सैरू मा टकलगैं कि काम करणा छौं। कैं बार हम कोरोना मरीजु ध्वार भि जाणा छौं, लेकिन विभागन हमथैं न त मास्क दीं अर सैनिटाइजर हि दीं। उन्न ब्वाळ कि हम 2007 बटि स्वास्थ्य विभागम काम करणा छौं। लेकिन अबि तक हमरी तनखा कतगा च यूं तक तय नि च।

मुख्यमंत्री न आशा अर आंगनबाड़ी कार्यंकत्रियों थैं समझै अर ब्वाळ कि हमन आशा अर आंगनबाड़ी कार्यकत्रियों थैं 1000 रुप्या ईनाम दिंणा खूंणि फैल्ळ (फाइल) त्यार कैरि याळी। उन्न वाळा कि तनखा का मामळा मा हम जळदी ही विचार करळा।