प्रदेश मा शुरू ह्वै 18 से 44 साळ क मनखियों खूंणि कोविड टीकाकरण
मुख्मयंत्री तीरथ सिंह रावतन आज राजधानी देहरादून क हरिद्वार बाईपास मा बण्यूं राधास्वामी सत्संग ब्यास आश्रम बटि 18 से 44 साळक ळोगु थैं टीका लगौण क अभियानक शुरूआत कायी।
मुख्यमंत्री तीरथ सिंह रावतन ब्वाळ क प्रधानमंत्री जी का नेतृत्व मा टीकारण का तिसरू दौरा शुरू ह्वै ग्यायी। जैमा प्रदेश क 50 लाख ज्वान मनखियों थैं कोविड टीका ळगळु। उन्न ब्वाळ कि उत्तराखण्ड पैळु राज्य च जख सबसे पैळि 18 साळ क मनखियों थैं फ्री मा टीका लगौण क घोषणा ह्वै, उन्न ब्वाळ कि ये टीकाकरण खूंणि सरकार 400 करोड़ रुप्यों क खर्चा कारळी। मुख्यमंत्री न ब्वाळ आज बटि प्रदेश मा 18 से 44 साळक मनखियों खूंणि टीकाकरण क शुरूआत ह्वै ग्ये।
मुख्यमंत्री न ब्वाळ कि हमरि सरकारौं लक्ष्य च कि कोविड टीकाकरण थैं हर न्याय पंचायत तक ळिजव्वां। उन्न ब्वाळ कि हर न्याय पंचायत मा टीकाकरण का कैंप लग्ये जाळा।
उन्न जिलाधिकारियों थैं ब्वाळ कि सब्बि टीकाकरण बूथों मा बुढ़यां अर दिब्यांग जनों खूंणि अळग से व्यवस्था करै जावा, जै से कथैं परेशानी न हो। मुख्यमंत्री न सब्बि प्रदेशवासियों से अपीळ कायी कि टीकाकरण का बाद भि मास्क, अर हाथौं थैं बार-बार सैनिटाइजर, एक दुसर से दूरी अर कोविड नियमों का पाळन करण जरूरी च।
ऐ मौका पर कैबिनेट मंत्री सुबोध उनियाळ, उच्च शिक्षा मंत्री धन सिंह रावत, विधायक राजपुर खजानदास, धर्मपुर विधायक विनोद चमोळी, मुख्यमंत्री क सळाहकार आरबीएस रावत अर जिलाधिकारी देहरादून मौजूद छायी।