यूकेडी न कायी बाळावाळा मा सैनिटाइजेशन कू काम

देरादूण। उत्तराखण्ड क्रांन्ति दळन आज बाळावाळ मा कोरोना वाइरस थैं मरणां खूंणि, दवै छिड़क्णन कु काम उर्यायी।

यूकेडी का केन्द्रीय मीडिया प्रभारी शिवप्रसाद सेमवाळन ब्वाळ कि हमन थाड़ (सार्वजनिक जगह) मा जख बटि जादा संक्रमण फैळण कु खतरा हूंद, अर जै घौर मा संक्रमण जादा च वख टक (ध्यान) लग्गें कि सैनिटाइजेशन करण कू काम कायी।

यूकेडी मीडिया प्रभारी न बतै कि ऐ काम मा बाळावाळा वार्ड नम्बर 99 मा ऊंईं जगा मा जादा ध्यान द्यायी जख लॉकडाउन मा ळोग जादा अन्दीन। उन्न ब्वाळ क हमरू यू अभियान अगने भि लचणूँ राळु।

यूकेडी का केन्द्रीय महामंत्री किशन सिंह रावतन बतै कि हमन उत्तराखण्ड क सब्बि जिला अध्यक्षों थैं अपड़ा-अपड़ा जिळों मा सैनिटाइजेशन करणा खूंणि बोळी याली। उन्न ब्वाळ यां खूंणि कुमौं प्रभारी कुंदन सिंह बिष्ट थैं कुमौ का नोडळ अधिकारी बणैंयें ग्यायी।

यूकेडी क युवा मोर्चा की जिला अध्यक्ष सीमा रावतन ब्वाळ कि अगळु चरण मा भानियावाळा अर अठूरवाळा मा सैनिटाइजेशन कू काम करै जाळु, किलैकि वख कोरोना संक्रमण मनिख जादा मिळणा छन।

सैनिटाइजेशन क ऐ काम मा यूकेडी का महामंत्री किशन सिंह रावत, केन्द्रीय संगठन मंत्री संजय बहुगुणा, केन्द्रीय मीडिया प्रभारी शिव प्रसाद सेमवाळ, जिळाध्यक्ष केन्द्र पाळ सिंह तोपवाळ, उपाध्यक्ष प्रमोद डोभाळ, जे एस गुसाईं, धर्मवीर सिंह, युवा मोर्चा क नगर अध्यक्ष अंकित घिल्डियाळ, युवा मोर्चा क जिळा अध्यक्ष सीमा रावत अर प्रकाश सिंह एवं पंकज कपूर छायी।