सब्यौं थैं जल्दी-जल्दी चैंणींच दवै : अदार पूनावाळा

कोरोना क दवै कोविशील्ड बणाण वळी कम्पनी सीरम इंस्टीट्यूट ऑफ इंडिया क सीईओ अदार पूनावाळा न ब्वाळ कि ऊंकी छुईं कचमोड़ी ळोगु थैं बतायें जाणीं छीं।

उन्न ब्वाळ कि हम कोरोना से लड़ै मा भारत थैं मजबूत करणा खूंणि जादा जिमदारी से काम करणा छाैं।

फाइनेंशियळ टाइम्स दगड़ बात करदा उन्न ब्वाळ कि हमन जादा दवै इळैं नि बणैं कि कैळ भि हमथैं दवै बणाण कू काम (आर्डर) हि नि द्यायी। उन्न ब्वाळ कि सौंण क मैना तक दवै क कमी हि रैळीं। उन्न ब्वाळ कि हमन सोचि भि नि छायी कि साळ भर मा हमथैं 1 अरब से जादा दवै बणाणीं प्वाड़ळी।

अखबारळ पूना वळ क तरफ बटि ब्वाळ कि जनवरी मा जब कोरोना का मामळा घटंण बैठिग्यी त सरकारळ बौत हल्का मा लिंण शुरू करै द्यायी। अर अब हम राति-राति मा जादा से जादा दवै नि बणैं सकदा। उन्न ब्वाळ कि हमथैं समझण प्वाड़ळ कि भारत मा मनखि जादा छन अर इगता मनखियों खूंणि दवै बणौंण कुईं आसान काम नि च।

उन्न ब्वाळ कि अबि तक हमथैं 26 करोड़ दवै बणांणा खूंणि मिल्ळी छायी। जैमा हमन 15 करोड से जादा दवै बणैं क द्यिाळी, अर कुछ हि मैनों मा हम 11 करोड़ दवै औरि बणैं कि सरकार थैं दे द्युळा।

उन्न ब्वाळ सबि मनखियों थैं जल्दी से जल्दी वैक्सीन चैंद, अर हमरि कोशिश भि च कि जल्दी से जल्दी सबि ळोगु थैं दवै मिळ जावा। हम अपड़ि तरफ बटि लगातार काम करणा छन।

उन्न ब्वाळ कि भारत क कोरोना से ईं लडै़ मा हम जादा से जादा मेहनत करळा अर करणा छौं।