मुख्यमंत्री तीरथ सिंह रावत न दुबरा द्यायी विवादित बयान, ब्वाळ 20 बच्चा पैदा करदा त जादा राशन मिळदु

फटी जींस पर मुख्यमंत्री तीरथ सिंह क बयान पर विवाद अभि थमि भि न छायी कि मुख्यमंत्री एकदा दुबरा विवादास्पद बयान देकैकि चर्चा मा ऐग्यीं।

विश्व वानिकी दिवस पर रामनगर में उर्यु एक कार्यक्रम मा मुख्यमंत्री तीरथ सिंह रावतन प्रधानमंत्री नरेन्द्र मोदी बढै़ करदा ब्वाळ कि प्रधानमंत्रीळ लाॅकडाउन मा मनखियों थैं फ्री राशन द्यायी। कुटुमदरि मा एक मनखि थैं 5 किलो राशन दिये ग्यायी। अब जै कुटुमदरि मा 10 लोग छायीं उथैं 50 किळो, अर जै मवासों मा 20 मनखि छायीं ऊथैं 1 क्विंटळ अच्छु राशन दियेग्यायी। जै कारण से मवासों मा ठिमसाण (जलन) ह्वै ग्यायी, कि हमथैं त 10 किळो राशन हि मिळीं पर दूसरों थैं 1 क्विंटळ मिळ ग्यायी। इतगा हि न यांका बाद उन्न ब्वाळ कि जब बच्चा पैदा करणा छायी तब तुमन 2 हि पैदा करि, अर तुमरा पड़ोसीळ 20 बच्चा पैदा करि त वथैं जादा राशन मिळ ग्यायी, तुम भि ज्यादा बच्चा पैदा करदा त तुमथैं भि ज्यादा राशन मिळदु।

मुख्यमंत्री तीरथ सिंह रावतन प्रधान मंत्री क बढै़ कायी अर ब्वाळ कि लाॅकडाउन मा उन्न एक अलख जगायी अगर उंकी जगह कुंई औरि हुंदू त पता नि देश मा क्या हूंदू। हम बस बेहाळ ह्वै जांदा। उन्न हमथैं राहत द्यायी।