राज्य आंदोळनकारियों न अपड़ि मांगों थैं ळेकैकि कायी विधानसभा कूच

उत्तराखण्ड राज्य आन्दोळनकारियों न आज अपड़ि मांगों थैं लेकैकि विधानसभा कूच कायी।
कूच का दौरान रिस्पना पुल से पैळि बेरिकेटिंग पर पुळिस अर आन्दोळनकारियों का बीच झड़प ह्वै ग्यायी।

उत्तराखण्ड राज्य आंदोळनकारी मंचक बैनर क ताळ आंदोळनकारियों न विधान सभा कूच कायी। रिस्पना पूळ पर पुळिसळ बैरिकेटिंग ळग्गै कि ऊंथैं रोक द्यायी। बैरिकेटिंग पर आन्दोळनकारियों अर पुळिस क जवानौं क बीच धक्का-मुक्कि भि ह्वै ग्या। जैका बाद आन्दोळनकारी वख्मि धरना पर बैठि ग्यी।

राज्य आन्दोळनकारियों क ब्वाळ क पिछळा चार साळु बटि राज्य हित अर आन्दोळनकारियोंक 8 सूत्रीय मांगों थैैं लेेेेेेकैकि ळगातार आन्दोळन करणा छन, लेकिन केवळ अर केवळ आश्वासन क अळावा ऊंथैं कुछ नि मिळी।

आन्दोळनकारियों क मांग च कि मुजफ्फरनगर रामपुर तिराहा कांड पर सरकार अबि तक पैरवी नि कैरि साकी जै कारण 26 साळ बाद ळि न्याय नि मिळु। उन्न ब्वाळ कि राज्यक अधिकारी ये मामळ थैं ळटकाणा खुणि जिमेदार छन। आन्दोळनकारियाेें न ब्वाळ कि प्रदेश सरकारळ पहाड़ मा भू-कानून मा छूट दै कैकि प्रदेश की अवधारणा थैं खत्म कैरि द्यायी, उन्न ब्वाळ कि भू कानून थैं छट्ट खत्म कैरै जावा।

आन्दोळनकारियों न ब्वाळ कि राज्य सरकारळ राज्य आंदोळनकारी सम्मान परिषद थैं खत्म कैरि द्यायी। सरकार राज्य आन्दोळनकारियों थैं मिळण वळि सुविधाओं थैं मट्ठु-मट्ठ कैकि खत्म करणी च। चार साळ बटि राज्य आंदोळनकारियों क चिन्हीकरण बन्द छन, उन्न ब्वाळ कि एक समान पेेंशन, शहीद स्मारकों रखरखाब पर भि सरकार ध्यान नि दिंणी च। उन्न राज्य आंदोळनकारी सम्मान परिषद थैं शुरू करणा क मांग कायी।

ये मौका पर राज्य आंदोळनकारी ओमी उनियाळ, जगमोहन सिंह नेगी, प्रदीप कुकरेती, पूरण सिंह , डी. एस. गुसाईं जबर सिंह पावेळ, वेद प्रकाश शर्मा अर बिन्ड़ि संख्या मा आन्दोळनकारी मौजूद छायी।