देरादूण मा अब स्मार्ट स्कूलों मा पाढ़ळा बच्चा

देरादूण। देरादूण मा स्मार्ट सिटी कु काम अब दिखेण बैठि ग्यायी। देरादूण मा तीन स्मार्ट स्कूल बण कैकि तैयार छन। स्कूल मा बच्चों थैं तकनीकी आधार पर शिक्षा दियै जाली। स्मार्ट स्कूल मा पैढ़ खुणि सबि सामान नै लग्यें जाळा।

उत्तराखण्डै सरकार बौत जल्दी स्मार्ट स्कूळों थैं दून वासियों थैं दिंण वळी च। स्कूळ मा गरीब बच्चों थैं पैळि भर्ती करै जाळु।

केंद्र सरकारै स्मार्ट सिटी परियोजना मा देरादूण बौत बाद मा शामिळ ह्वै ळेकिन त्रिवेन्द्र सरकारळ स्मार्ट सिटी का काम थैं पैळि प्राथमिकता द्यायी अर काम करणा कु बिड़ा उठायी। मुख्यमंत्री न बगत-बगत पर देरादूण मा बणणि वळी योजनाओं कू निरीक्षण कायी। डेढ़ मैना पैळि उन्न परेड ग्राउण्ड अर स्मार्ट स्कूल परियोजना कू निरीक्षण कै छायी। अब देरादूण मा स्मार्ट स्कूल लगभग बणिक तैयार छन। 15 दिसम्बर तक स्कूळों मा सबि काम पुरा ह्वै जाळा।

राजकीय बाळिका इंटर काॅळेज राजपुर रोड, राजकीय इंटर काॅळेज खुड़बुड़ा अर वखमा हि मा राजकीय कन्या जूनियर हाई स्कूळ थैं स्मार्ट स्कूळों तैयार करै ग्यायी।

स्मार्ट स्कूल मा बहनजी/ गुरूजी अर बच्चों क हाजिरी बायोमीट्रिक मशीन से ह्वैळी। मास्टर बच्चों थैं डिजीटन बोडॅ मा पढ़ाळा। सर्या स्कूळा मा सीसीटीवी कैमरा ळग्ये जाळा। सबि कमरों मा नै कुर्सी, मेज अर कम्प्यूटर ह्वाळा। स्कूल मा आई टी, पुस्तकाळय, प्रधानाचार्य खुणि डैश बोर्ड जन सुविधा ह्वैळी। सबसे खास बात या कि तिन्या स्कूळ डिजिटल माध्यम से एक दूसर दगड़ा मा जुड़या राळा। या से फैदा याेें च कि अगर कै स्कूळ मा गुरूजी नि छन त दूसरा स्कूळ का गुरूजी पढ़ाळा।