ढोल दमाऊं क दगड़ भैळों खैळिक धुमधाम से मन्नै ‘इगास’

देवभूमि इगास महोत्सव समिति क तरफ बटि वृहस्पतिवार खुणि कुंजापुरी हरिद्वार बाई पास मा इगास भैळों क कार्यक्रम उर्यै ग्यायी। कार्यक्रम मा मुख्यमंत्री क औद्योगिक सळाहकार के.स. पंवार न मुख्य अतिथि छायी।

मुख्य अतिथि केएस पंवार अर पूर्व मंत्री खजान दास न भैळो भि ख्याळ अर ढोल दमाऊ पर ताळ भि मिलै।

ये मौका फर समाजसेवी अर गैरसैंण राजधानी निर्माण का संस्थापक रघुवीर सिंह बिष्ट न ब्वाळ कि देश में सभि प्रदेशों का अपड़ा अपड़ा लोकपर्व छन। लेकिन आज 20 साळ बाद भि उत्तराखण्डों क कुई राज्य पर्व नि च। उन इगास थैं राज्य पर्व घोषित करणा की मांग सरकार से कायी। उन ब्वाळ कि संस्कृति अर भाषा समाज क रीढ़ क हड्डी हुंदि, इल्लै हम थैं अपणि संस्कृति थैं कभि न भुल्ण चैंद।

समिति क अध्यक्ष लक्ष्मण रावत न भि इगास थैं राज्य पर्व घोषित करणा की मांग सरकार से कायी, अर सरकार सै इगास तिवार क दिन मा राज्य मा छुट्टी करण मांग कायी। उन ब्वाळ क लगातार बदल्णु सामाजिक दौर मा उत्तराखण्ड क सभ्यता अर संस्कृति थैं बचाणा आवश्यकता च। जै से हम अपड़ि संस्कृति थैं अगने आण वळि पीढ़ियों का हाथों मा दे सक्या, या खुणि हम सबि थैं मिळ कैकि प्रयास करण चैंद।

कार्यक्रम मा उत्तराखण्डि स्वर कोकिळा मीना राणा अर संजय बुटोळा न अपड़ि आवाज से ळोगु थैं नचड़ा पर मजबूर कैरि द्यायी।

कार्यक्रम मा स्वामी दर्शन भारती, श्रीमती रेखा नेगी, गैरसैंण राजधानी निर्माण अभियान क रणनीतिकार मनोज ध्यानी, युवा संयोजक मदन भण्डारी, डांडी कांठी क्लब क अध्यक्ष विजय उनियाल, कृष्णानन्द भट्ट, अनिल गोदियाळ, वीरसिंह चैहान आदि उपस्थित छायी।