आखिर क्या च? हरक सिंह क लगईं सियायी आग क मायने

उत्तराखण्ड क राजनीति मा एक दा फिर सियासी भूचाळ ऐग्यायी। अबक दा ये सियासी भूचाळ कि केन्द्र बिन्दु वन मंत्री डाॅ. हरक सिंहं रावत छन। डाॅ. हरक सिंह रावत न मीडिया मा ब्वाळ कि उन्न अब 2022 मा चुनाव नि ळड़न। जै कारण से सियासी गलियारों हलचळ मचि ग्यायी।

या बात इल्ळै जादा खास च कि अबि द्वि दिन पैळि ही सन्निर्माण कर्मकार कल्याण बोर्ड क अध्यक्ष पद बटि उथैं हटाये ग्यायी। जै कारण से प्रदेश में चर्चाओं क बाजार गर्म छायी।

सरकारळ कबीना मंत्री डाॅ. हरक सिंह रावत थैं अध्यक्ष पद बटि हटै कि पुरू बोर्ड थैं भंग कैरि द्यायी लेकिन दमयंती रावत थैं सचिव क पद बटि नि हटाई। जै पर सवाळ उठणा छायी कि आखिर सचिव पद पर बटि दमयंती रावत कि विदै कब?

ब्याळि डाॅ हरक सिंह रावत सन्निर्माण कर्मकार कल्याण बोर्ड के दफ्तर पौंची कैकि उन्न मीडिया दगड़ बातचीत कायी अर ब्वाळ कि अब उन्न 2022 मा अब चुनौ न लड़न। उन्न ब्वाळ कि तीस साळ बटि विधायक छन, अर चार बार क कैबिनेट मंत्री। उन्न ब्वाळ कि अब नैं ळोगु थैं मौका मिळण चैंद। दगड़-दगड़ उन्न ब्वाळ कि येकु मतबळ इन्न नि च कि मि राजनीति बटि संयास ळिंणु छौं। उन्न ब्वाळ कि राजनीति मा राळु लेकिन चुनौ नि लड़न का मन बौत पैळि हि बणैं याळी छायी, बाकी हाई कमान का फैसळा।

डाॅ. हरक सिंह रावत क अचाणचक ये फैसळा न उत्तराखण्ड कि राजनीति थैं ह्वा मिळ ग्यायी अर चर्चा चारौं तरफ हूंण बैठि ग्यायी कि हरक सिंह अध्यक्ष पद बटि हट्टै जाणा क कारण नाराज छ, अर दवाब बढ़ाणा खुणि ब्वळणा छन कि 2022 क चुनौ नि लड़न। ऊंकी नाराजगी या च कि बोर्ड भंग या फिर उथैं अध्यक्ष पद से हटाणा से पैळि उथैं विश्वास मा नि ळियें ग्यायी

दूसर तरफ डाॅ. हरक सिंह रावत बयान से सियासी मतलब निकळै जाणा छन। कुई ऐथैं ऊंकी नाराजगी तरौं दयख्णा छन त कुछ ळोग ये थैं विजय बहुगुणा खुणि राज्य सभा कि लाॅबिग बताणा छन।

यामा इन भि नजर आंणु च कि डाॅ. हरक सिंह रावत एक तीर न द्वी निशाणा सादणा कु काम करणा छन। एत तरफ ऊंकि बयान मा साफ नाराजगी दिख्येणी च, त दूसर तरफ दबाव क सियायत भि झलकणि च। डाॅ. हरक सिंह विजय बुहुगुणा खुणि राज्यसभा टिकक दिळााणा खुणि खुळकैकि पैरवी करणा छन। वखि या बात कै सै छिपी नि च कि डाॅ हरक सिंह रावत अपड़ा बयानों का कारण हि हमेशा चर्चा में रैन्दन।

2012 मा भि हरक सिंह रावतन मा धारी देवी की कमस खैं छायी कि अब मंत्री मिळ बण , लेकिन यांका बाद उल्ल अपड़ि कसम तोड़ द्ये छायी। अब हरक अगनै कदम क्या च यू त अबि भविष्य का पुट्गा म च, लेकिन अबि त वन मंत्री हरक सिंह रावत न हूंद का मैन मा उत्तराखण्ड मा सियासी गर्मी पैदा करणा खुणि माचिसक तिल्ली त झाड़ि कि आग त लगै हि द्यायी।

अब बस दिखणवळी बात त या च आग कतगा देर, दूर अर कै कैथैं अपड़ि चपेट मा लिंद।