जैनी मामलु, आखिर सच समणि आण चैंद

उत्तराखण्डै राजनीति मा पूरणा विवादु का समणि औंणु क्वीं नै बात नीं च, पर जब कै पूरणा मामला एक ब्यटुला की निसाब मंगण की मांग समणि आंद त, सिरफ राजनीतिक बयान बोलिकि चुप नीं रैये जै सकदु। पैल्यक कैबिनेट मंत्री अर कांग्रेसा नेता हरक सिंह रावत से जुड्यूं 23 साल पूरणु मामला प्रदेसम भ्यूंचळु ऐग्ये।

जैनी न देरादूण पौंछिकि पत्रकार वार्ता कायी अर बोलिकि हरक सिंह रावतन हि मि दगड़ि गलत काम कायीं। वींन बोलिकि उबरि मि सोला सालै छायीं, तब मि दगड़ि यीं सबि ह्वे। वींन बोलिकि म्यार ब्येटा तैं बि अपणु बुबा कु नौ जंणणा कु अधिकार च। जैनी की प्रेस वार्ता का बाद प्रदेस राजनीति मा एक दूसरा कु मुण्ड-कपाल फोड़णु सुरु ह्वेग्ये।

साल द्वी हजार तीन मा जैनी न हरक सिंह रावत पर अपडु दगड़ि गलत काम करणा कु आरोप लग्यें छायीं। यांका बाद उबरि विधानसभा बटि हरक सिंह रावत तैं मंत्री पद बटि इस्तीफा देंण पोड़ि। बाद मा यांकी सीबीआई जांच ह्वे, डीएनए की जांच ह्वे, जांच में हरक सिंह रावत अर बच्चा कु डीएनए नीं मिलि या बात समणि ऐ। यांका बाद जैनी न हरक फर लग्यां आरोपु तैं गलत बतै।

लेकिन यांका बाद बि या कहाणि खतम नी ह्वे अर साल द्वि हजार सोलह मा एकदा दुबरा जैनिन हरक पर अपड़ा दगड़ि गलत करणा कु आरोप लगौंणा की सिकैत पुलिस मा कायी। लेकिन बाद मा फेरि जैनिन अपड़ा बयान बदली कै दींन। जैनी न बयान दींन कि मितैं एक बड़ा नेता न हरक का खिलाप सिकैत करणा वा वास्ता बोलि छायीं।

अब नवंबर द्वी हजार छब्बीसम जैनी एकदा दुबरा समणि ऐ। जैनी 2003 की बात दुबरा बोलि अर बोलिकि हरक सिंह रावतन वींका दगड़ि गलत कायी अर बोलिकि वींथैं बिना पढ़याँ कागजु पर दस्तखत कर्ये ग्यीन। वींन दुबरा जांच अर डीएनए टेस्ट करौंण मांग कायी।

ऐ मामला मा हरक सिंह रावतन अप्फु तैं बेकसूर बतै, अर बोलिकि ऐ मामला मा सीबीआई जांच बि ह्वेग्ये। 23 साल बाद दुबरा यीं घटना का समणि आण से हमरि राजनीति अर न्याय बन्दुबस्त पर सवाल खड़ा कै दींन।

यखम सवाल सिरफ हरक सिंह रावत पर लग्यां आरोपु कु ना, बल सवाल हमरि न्याय व्यवस्था, जांच प्रक्रिया फर बि छन, जैमा एक ब्यटुला तैं निसाब का वास्ता 23 साल लगिग्येन। जैनी कु ब्वनु च कि पैलि ज्वा जांच ह्वे वा ठीक नीं छायीं। उन्नि डीएनए जांच फर बि सवाल खड़ा करिन। त दूसर तरफा हरक सिंह रावत पैल्यां की जांच अर कोर्ट कु फैसला तैं सै बतौंणा छन। इन्न मा अब जरूरी यों च की द्वियों की बात सूंणि की सबि तथ्यों की जाणकारी का अधार सच समणि आंण चैंद।

राजनीति मा हरक सिंह रावत कु अपणु मान च। सत्ता मा या फेरि विपक्ष मा हूंदा बि हरक सदनि अपणा बयानु का वास्ता चर्चा मा रंदन। हरक कु समणि अब 23 साल पूरणु इन्नु मामला च , जैंथ पटलवार केकि खतम नीं करे जै सकद। हां अगर ‘हरक ऐ मामला मा निर्दोष छन त निष्पक्ष जांच का वास्ता उतैं समणि औंण मा क्वीं दिक्कत नीं हूंण चैंद।’

खास बात कि हमतैं जैनी का लग्यां आरोपु फर आंखा बुझिकि विस्वास नीं बि नी करण चैंद अर बिना जांच का कतै सच नीं मनण चैंद। किलैकि जैनी न इन्न आरोप त पैलि बि लगै अर बाद मा अपिण सिकैत वापिस बि ल्यायी। यांका बाद बि जैनी का बयान तैं सिरफ राजनीतिक चाल बतै कि बखास्त (खारिज) नी करे जै सकदु। अगर पैलि जांच की क्वीं बि कमी रैग्यायी त यांकी बि जांच हूंण चैंद। किलैकि अगर एक ब्यटा का पितृत्व पर सवाल खड़ा हूंदन त यांकु हल कानून अर वैज्ञानिक जांच मा हूंण चैंद।

कै बि नेता कु राजनीतिक कद इतगा बडु नीं हूंदू वैका खिलाप उठयां सवालु का जवाब नीं दिए ज्यां अर ना हि कैथें सिरफ अरोप लगणा का अधार पर दोषी मन्यें ज्यां। किलैकि कै राजनीति मा कै मनखि की साख तैं खराब करणा का वास्ता वे फर अरोप लगौंणा बि उतगै गलत च जतगा कै पीड़ित की अवाज तैं दबौंणु। इल्लै ऐ मामला न त हरक तैं गुनाहगार मनणु सै च अर न जैनी का लग्यां अरोपु तैं बिना जांच का गलत ब्वनु। कानूनन सब्यों का वास्ता बराबर च। हरक अगर ऐ मामला मा दोषी छन त ऊंतै सजा मिलण चैंद, अर अगर निर्दोष छन त जांच मा या बात साफ हूंण चैंद।

या बात बि साफ हूंण चैंद कि आखिर जैनी न बार-बार अपड़ा बयान किलै बदलि करिन? क्य वीं फर क्वीं राजनैति दबाव या फेरि क्वीं हौरि दबाव छायीं? अगर छायीं त कैकु? अर इगता सालु बाद समणि औंणु अर हरक फर दुबरा आरोप लगौंण की सच्चै क्या च? यु सवालु कु जवाब राजनीतिक बयानबाजी से ना, बल सै जांच अर न्यायालय से हि मिलि सकदु।

आखिरम सवाल एक नेता की राजनीतिक मान से बि बडु च। सवाल एक ब्यटुला कु मान, वैंकी ब्यटा की पछ्याण अर न्याय व्यवस्था अर जनता कु भरोसा कु बि च। जैनी प्रकरण तैं राजनीतिक हत्यार बणौंणा बजाय यांकु निष्पक्ष हल हूंण चैंद, अर 23 साल पूरणु ऐ मामला अब सच समणि आण चैंद अर सबि सवालु का जवाब मिलण चैंदन।