पोथी की जगा हथ्यार, कोच यांकु जिम्मेबार?

देरादूणा पछ्याण शिक्षाक् नगरी का रुप मा जणै जांद। सर्या देस बिटि पढ़दरा यख पढ़णा का वास्ता आंदन। पर 20 अगस्त खुणि सेंट ज्यूड्स चौक, पटेलनगर देरादूण मा द्वी छात्र गुटों का बीच ज्वा घटना ह्वे वीं घटना से सवाल खड़ा हूंणा छन।

यु मामला सिरफ द्वी छात्र गुटों का बीच तकरार ना बल या बदली मानसिकता की बि सानी करणु च। जैमा छेड़ी कु जवाब बातचीत ना, बल लाठा अर बंदुक से दिए जाण बैठिग्ये।

घटना पेटलनगर क्षेत्र बटि मारपिटै से सुरु ह्वे। यांका बाद एक दुसरा कु पिछनै कैकि सेंट ज्यूड्स चौक मा गोली चलयें ग्यायी। गोलिन एक 21 साला नौनु घैल ह्वेग्यायी। पुलिसा जांच मा या बात पता चलि कि यु द्वियों गुटों का बीच पूरण विवाद छायीं। ऐ मामला मा चार नौंनो पकड़े बि ग्येन।

यखम बडु सवाल यों च कि पढ़ै करण का वास्ता अयां पढ़दरों का हत्थु मा हथियार कख बिटि पौंछिन? यु फर जरा सी विवाद मा हथियार निकालिकि सड़क फर गोळी चलौंणा की हिकमत कनकैकि ऐ? या से बि जादा चितै बाद कि द्वी गुटा बीच कु विवाद इतगा बढ़िग्ये कि किलोमीटर एक दूसरा की पिछनै कैकि गोळी चलौंणा छन। यु तैं कानून की क्वीं डैर नीं च।

या घटना इतगा इल्लै डरौंणि च कि या गोळी कखि सुनसान जगा मा ना बल, या गोळी बीच सड़क मा चलै ग्यायी, गोळी कैतै बि लगि सकदि छायीं। यी घटना मा सबसे खतरै बात या च कि झगड़ा त द्वी गुटों कु बीच कु छायीं पर यांकु खतरा त सर्या समाज तैं छायीं

यीं कारण च की पिछल दिनु बिटि देरादूण मा खळाखळ हूंणि इन्न घटणा से देरादूण मा डैऽर कु बातावरण च। शांत देरादूण तैं कखि कैकि नजर त नी लगि ग्ये?

असल चुनौती त या च पढ़दरा की हिंसा कारण का कारण तैं समझणा की चि। बड़ा सहर बटि आण वला यी पढ़दरा देरादूण मा शिक्षा अर भवेष्य बणौंणा का स्वींणा लेकैकि आन्दन। जादा त यख पढ़ै करदन पर कुछ इन्ना बि हूंदन जु अपराधिक गतिविधियों मा फंसि जान्दन। यीं उमर मा दादागिरी, गुट बणै की, नसा अर हथियार चलौंणा संस्कृति तैं अगनै बढ़ौंन्दन।

यामा शिक्षण संस्थानु की बि जिम्मेदरि कम नीं च। कॉलेज सिरफ डिग्री देंणा का वास्ता हि नी छन बल यख पढ़दरौं तैं व्योवहार, अनुशासन, अर मानसिक दबौ फर बि नजर हूंण चैंद।

अगर क्वीं पढ़दरा का खिलाप झगड़ा, धमकौंणे की शिकैत मिलणि छन त वै तें कतै नजरअंदाज नीं करण चैंद। ब्वे, बुबा, कॉलेज प्रशासन, हॉस्टल अर पुलिस का बीच तक तालमेल हूंण चैंद।

देरादूण तैं शिक्षा कु प्रदेस बणै की रखण मा सरकार अर पुलिस की जिम्मेदरि हि नी च, बल या सहर का हरेक कुटुम्दरि की उमेद अर हरेक ऊ लोगु की च जु यख अपड़ा बच्चों तैं पढ़णा का वास्ता भेजदन।

पटेलनगर सेंट ज्यूड्स चौक मा चली गोळि तैं आपस कु विवाद तैं एक झगड़ा मानिकि भूलि जाणु हमरा वास्ता खतरनाक होलु। या हमर वास्ता एक चेतावनी च कि देरादूण शांत पछ्याण तैं बणौंणा वास्ता हमतैं कड़ा कदम उठौंण प्वाड़ला। शिक्षा की नगर मा पोथी (किताब) की जगह हथ्यार अर छ्वी बत्थौं की जगा झगड़ा कु चलन कतै मंजूर नीं करे जै सकदु।