बुबा जी न सिखै छायीं की राजनीति पद का वास्ता ना बल राजनीति जनसेवा कु बाटु च:: धामी

मुख्यमंत्री धामिन खटीमा खेतलसंडा मा सीएसडी कैंटीनम सेवा संकल्प धारिणी फाउंडेशन कु उर्यंू स्व. सूबेदार शेर सिहं धामी की छठी पुण्यतिथि उर्यूं गौरव सैनिक सम्मान समारोह म भाग ल्यायीं।

ऐ मौका फर मुख्यमंत्रिन 715.52 लाख रुप्यौं से बणि सीएसडी कैंटीन अर 162.26 लाख रुप्यौं से बण्यूं सैनिक मिलन केन्द्र कु लोकार्पण कायी।

ये मौका फर मुख्यमंत्रिन स्व. सूबेदार शेर सिंह धामी की फोटु पर फुळ चढ़े न। उन्न शहीदु क कुटुम्बरि अर वीर नारियों तैं पंखी पैरिकि सम्मानित कायी। एक मौका फर 60 वीर नारियों अर 80 वीर योद्धौं तैं सम्मानित कायी।

मुख्यमंत्रिन बोलि यु मि खुणि बौत भावुक क्षण च किलैकि यु आयोजन म्यरा बुबा जी की याद मा उर्यंे जाणु च। उन्न बोलि छै साल पैलि यु दिन मेरि जिन्दगि कु सबसे बुरु दिन छायीं। उन्न बोलिकि म्यरा बुबा जी का विचार, सिद्धांत अर मेनत आज बि मितैं प्रेरित करदि। उन्न बोलिकि म्यरा बुबा जी अपणि बर्दी कु बौत सम्मान करदा छायीं। यां से मितैं शिक्षा मिलिकि एक फौजी वास्ता वैकी बर्दी ही वैकु सम्मान अर जिम्मेबरि च। उन्न बोलिकि मितैं बुबाजी न बोलि छायीं कि राजनीति पद वास्ता ना बल राजनीति लोगुक सेवा वास्ता करण हूंण चैंद।

मुख्यमंत्रिन बोलिकि मि फौज म नीं छौं यांका बाद बि फौजी तैं आर्दश मानिकि देस सेवा कु काम करणु छौं।

मुख्यमंत्रिन बोलिकि साल 2014-15 म देस कु रक्षा उत्पादन 46 हजार करोड़ रुप्या छायीं, जु आज 2024-25सम 1.54 करोड़ रुप्यौं कु ह्वेग्ये।

वखि रक्षा निर्यात बि बढ़िकैकि 38 हजार करोड़ रुप्यौं कु ह्वेग्ये। उन्न बोलिकि आज भारत 80 से जादा देसु तैं रक्षा सामग्री देंणु च।

मुख्यमंत्रिन बोलिकि प्रदेस सरकार सैनिक, शहीद, अर ऊंकी कुटुम्दरि की भलै का वास्ता काम करणि च। उन्न बोलिकि शहीदु क कुटुम्दरि तैं मिलण वलि अनुग्रह रुप्यौं तैं बढ़ये ग्यायी अर आश्रितु तैं सरकारी नौकरि बि दिये जाणि च। परमवीर चक्र से सम्मानित सैनिकु तैं मिलण वलि 50 लाख रुप्यौं की मदद तैं बढ़ैकि डेढ़ करोड़ रुप्या करे ग्यायी। उन्न बोलिकि देरादूणम सैन्यधाम बण्यें जाणु च, जै से आण पलि पीढ़ि तैं देसभक्ति की प्रेरणा मिललि।

ऐ मौका फर कैबिनेट मंत्री प्रदीप बत्रा, राम सिंह कैड़ा, मुख्यमंत्री की ईजा श्रीमती विशना देवी, मुख्यमंत्री घरवळि श्रीमती गीता पुष्कर धामी अर लोग छायीं।