कैबिनेट मंत्री महाराजन 26 करोड़ रुप्यौं की 18 विकास योजनौं कु कायी लोकार्पण अर शिलान्यास

उत्तराखण्डा कैबिनेट मंत्री सतपाल महाराज अपणि विधानसभा चौबट्टाखाल मा राजकीय इंटर कॉलेज किमगड़ि कु वार्षिकोत्सव मा भाग ल्यायी। एक मौका पर उन्न क्षेत्रा विकास वास्ता 26 करोड़ रुप्यौं की 18 विकास योजनौं कु लोकार्पण अर शिलान्यास कैकि जनता तैं दींन।

उन्न बोलि ऐ लोकार्पण मा लोक निर्माण विभाग, पंचायती राज, सिंचै विभाग अर ग्रामीण निर्माण विभागा काम छन। ऐ मौका पर कैबिनेट मंत्रिन जीआईसी किमगड़ी मा विज्ञान विषय की पढ़ै सुरु करणा घोषणा कायी। उन्न बतै कि पीएमजीएवाई स्टेज 4 जरिया पाबौ, इगासर, बीरोंखाल अर पोखड़ा विकासखण्ड खुणि 104 करोड़ रुप्या से 11 नै मोटर मार्ग बणौंणा मंजूरि मिलि ग्यायी।

कैबिनेट मंत्रिन बोलि कि हमरि सरकारन पंचैतु तैं हौरि कटकुटु बणौंणा वास्ता पंचैत भवन अर सिंचै की नै तकनीक पर खास जोर द्यायी। उन्न बोलि हमरि कोसिस चौबट्टाखालै गौं-गौं तक सड़क, पाणि अर हौरि सुविधा देंणा की च। कार्यक्रम मा उन्न कार्यकतौं से मुखाभेंट कायी अर सरकारै जनकल्याणकारी योजनौं तैं घौर-घौर तक पौंछाण विनती कायी।