मुख्यमंत्रिन रुद्रप्रयाग जिलम आपदा प्रभावित तोक कु ह्वै दौरा कायी अर अधिकारियों तैं 30 सितम्बर तक चंख रैकी रैंणा खुणि बोलि

मुख्यमंत्री धामिन आज जिला रुद्रप्रयाग का आपदा प्रभावित बसुकेदार तोकम तालजामण, डूंगर, बडे़थ, जौला, कमद, उछोला, छैनागाड़, पटुय गौं कु ह्वै दौरा कायी। यांका बाद मुख्यमंत्री जिला पंचैत सभागार रुद्रप्रयाग एक बैठक कायी अर आपदा प्रभावित तोकम बचाव अर राहत का कामु बिजली, पाणि, चिकित्सा अर स्वास्थ्य सुविधौं, अर श्री केदारनाथ धामा जातरा कु बन्दुबस्ता बारम जाणकारी ल्यायी।

मुख्यमंत्रिन बोलि कि ऐसु बस्गाल म सर्या प्रदेस समणि आपदा औंण से कठिण चुनौती छन। उन्न आपदा मा जिला प्रशासन जन तेजी से काम कायी यांका खुब तरिफ कायी। उन्न बोलि कि प्रशासन अर जनप्रतिनिधियों जन्न जनता बीच जैकि काम कायी वां से लोगु तैं हिकमत मिलि।

मुख्यमंत्रिन सबि अधिकारियों तैं औंण वलि 30 सितम्बर तक चंख रैकी आपदा से निपटणा खुणि त्यार रैंणा खुणि बोलि। मुख्यमंत्रिन बस्गाल खतम हूंणा बाद श्री केदारनाथ धामम जातरियों की संख्या बढ़णा की उमेद जतै अर जातरा वास्ता सबि बन्दुबस्त करणा बारम बोलि। उन्न बोलि जातरियां की सुरक्षा हमरि जिम्मेबरि च।