जनप्रतिनिधिक सिकैत पर एनएच क अधिशासी अभियंता नराज, सीडीओ न एफआईआर दर्ज करणा बात बोलि त अधिशासी अभियन्तन बोलि ‘कै द्यो’
जनप्रतिनिधिक सिकैत पर एनएच क अधिशासी अभियंता नराज ह्वेग्यींन। सीडीओ अर जिलाधिकारी न अभियंता तैं झट काम पूरु करणा बारम बोलि त पैलि त उन्न आदेश मनण से माना कै दे अर जब सीडीओ न एफआईआर दर्ज करणा बात बोलि त अधिशासी अभियन्तन बोलि ‘कै ल्यौ’।
16 सितम्बर खुणि गैरसैंण विकासखण्ड मा तहसील दिवस उर्यें ग्यायीं। तहसील दिवस मौका फर सीडीओ अर जिलाधिकारी हौरि अप्सर छायीं। जनतन अपणि दिक्कतु तैं लेकैकि तलसील दिवस मा पौंछि छायीं।
बतै जाणु च कि जिला पंचैत सदस्य कोठा वार्ड सुरेश कुमार बिष्ट, ग्राम प्रधान रंगचोणा मनोज नेगी, ज्येष्ठ प्रमुख लीलाधर जोशी, क्षेत्र पंचायत सदस्य वीरेंद्र आर्य, प्रधान अमरदीप व प्रधान सुरेंद्र नेगी न दिवालिखाल बिटि पांडुवाखाल तक सड़क की दसा अर नाली बणौंणा तैं लेकैकि सवाल कायीं अर एनएच क अप्सरु पर सवाल खड़ा करिन। तबि वखम एन एच का अधिशासी अभियंता ओंकार पाण्डेय जनप्रतिधियों पर हि गुस्सा ह्वेग्यींन।
सीडीओ अर जिलाधिकारी संदीप तिवारी न अधिशासी अभियंता तैं मौका पर जैकि सड़का की दसा तैं दय्खण निर्देश दींन। या फर अधिशासी अभियंता न सीडीओ तैं बोलि कि मि अबि मौका पर नीं जै सकदु , मितैं अबि देरादूण जाणा।
अधिशासी अभियंता कु इन्न बवनु सीडीओ तैं नखरू लगि अर उन्न अधिशासी अभियंता तैं चितै अर बोलि कि अगर तुम अबि मौका पर नी गायी त तुम फर एफआईआर दर्ज करे जाली। यांका बाद अधिशायी अभियंतन बोलि कि मि अबि मौका फर नीं जै सकदू, मिथैं अबि देरादूण जाणा। अधिशासी अभियंता कु यु जवाब सूणि कि सीडीओ न गुस्सम बोलि कि अभि जावा, तथर अबि एफआईआर दर्ज करे जाली। यां फर अभियंता न बोल ‘ठीक च साब कै द्यो।’
यांका बाद जब लोगुन अधिशासी अभियंता कु विरोध कायी अर बोलि कि यांकी सिकैत मुख्यमंत्री से करै जाली, त वु मौका फर जाणा खुणि त्यार ह्वेग्यीन।
ये मामला मा जब जिलाधिकारी न बोलि कि एन एच अधिकारिन गुस्सा मा ऐकि इन्नि बोत बोलि, यांका बाद ऊ मौका पर चलिग्यीन। उमेद च वु लोगुकि दिक्कत तैं दूर कारला।
दुसर तरफा ब्रिडकुला एई कु तहसील दिवस पर नीं औंणा से जिलाधिकारी नराज छन अर उन्न विभागीय कामु म लापरवै बतै अर सहायक अभियंता नरेश कुमार अर कनिष्ठ अभियंता आशीष मलेठा पर आपदा प्रबंधिन अधिनियम -2005च धारा म एफआईआर दर्ज करण आदेश दींन। द्विया अधिकारियों पर मुकदमा दर्ज करै ग्यायी।